Nuummi coronartoqaqqilertoq: Tunillaassuuttoqarnissaa ilimananngitsoq

Nuannaarneq sivikitsoq naavoq. Nunatsinni ulluni marlunni coronartoqanngereersoq napparsimasumik ataatsimik Nuummi nassaartoqarpoq.

Taanna ullut tallimat matuma siornatigut Danmarkimit nunatsinnut tikippoq, ullumilu misissorneqarpoq.

Tunillatsissimasup angerlarsimaannaqqusaanini malissimavaa, taamaammat Nuummi tunillaassuuttoqarnissaanut aarlerinartoqanngitsoq, Naalakkersuisut tusagassiuutinut nalunaarput.

Kapitereersut aamma misissortissasut

Coronavirusi sorliunersoq pisortat maannamut naluaat, suussusersinissaanummi nunatsinni atortorissaaruteqanngimmat Danmarkimut misiliut nassiunneqaqqaassaaq.

- Coronavirusi ilaat tuniluutianerusoq Deltamik taaneqartoq Europami siaruaanneruleriartornera peqqutigalugu, tunillatsissimasut angalanermi eqqaaniissimasut misissortinnissaat anguniarlugu nunatta nakorsaaneqarfianiit attavigineqassassut aalajangiunneqarpoq, pineqartut tamakkiisumik akiuussusersimagaluarpataluunniit aamma misissortissapput, Naalakkersuisut allapput.

Tassa imaappoq, tunillatsissimasup angalanerani eqqaaniissimasut tamarmik misissortissapput, taakkulu Nunatta Nakorsaaneqarfanit attavigineqassapput.

- Coronavirusit ilaat Deltamik taaneqartoq nunatsinnut apuunnissaa pinngitsoorneqarsinnaanngilaq. Angalasut tamarmik kiisalu angalasimasumut attavillit Covid-19-ip ersiutaanik atugaqartillutik misissortittarnissaat kaammattuutigineqarpoq, Naalakkersuisut allapput.

Taakku peqqissaavimmut qaninnermut attaveqassapput. Oqarasuuatit normui Nunatta Nakorsaaneqarfiata nittartagaani nassaarineqarsinnaapput.

Nunatsinni coronamik napparsimasut maannamut 51-upput taakkunannga 50-it peqqissereerput.