Nuummi allaffeeqqami takorluukkat imaannaanngitsut ineriartortut – illoqarfiullu nukappiartaannut nutaanik aqqutissiuussisut

Arnat inuusuttut marluk taakkuupput, Nuummi nukappissat angutillu inuusuttut inuuniarnermikkut atugaannik ineriartortitsinermi suliniuteqartuusut.

Mind Your Own Businessip allaffeeraani illoqarfimmiittumi ullut tamaasa suliassamik suliaqartoqartarpoq, inip kvadratmeterianiit initunerungaartunik: tassa illoqarfiup nukappiaaluttai angutitailu inuusuttut siunissamut isumallualersillugit.

Natuk Rosen Fleischer aamma Aviaaja Pedersen Lynge Nuummi nukappiaalunnut angutinullu inuusuttunut 13-it 21-llu akornanni ukiullit ineriartorluarfiusumik sammisaqaqataanermikkut pilersitseqataapput, taakku illoqarfimmi kajumissutsiminnik peqataasut inuussutissarsiornermilu peqatit suleqatigalugit peqataanermikkut suliffeqarfiuteeqqaminnik ineriartortitsillutillu sanaartortarput.

Suliffeqarfiilli aningaasallu pingaarnerpaajunngillat.

Inuusuttut suliaqartinnissaat siullertut aallutaraat. Atugaat pitsanngorsarlugit. Atassuteqaatinik pitsaasunik maligassiuilluartunillu peqalernissaat – taamaalillutik namminneq aamma taamaaliorsinnaanngorniassammata.

- Aningaasarpassuarnik iluanaaruteqarnissaat anguniaannarneqanngilaq. Taamaattoqassappalli qujanassaaq, kisianni suliaqarnerminni atassuteqaatigissaalernissaat pingaartinneqarneruvoq. Tassa nukappissanut taakkununnga sassartissinnaanngorlugit soqutiginnittunik sapaatip-akunneri tamaasa inersimasut takkuttarsinnaasut qujanassapput, Mind Your Own Businessimeersoq Natuk Rosen Fleischer oqarpoq.

Nukappissat tinnerneqarnissartik upperineqarnissartillu pisariaqartikkaat

Nukappissat angutillu inuusuttut sullinniarneqarneri nalaatsorneriinnaanngillat.

Taakkuuppummi naatsorsueqqissaartarfiup kisitsisaataanni amerlanerpaasut.

Meeqqat atuarfianniit ingerlaqqinngitsoortartut nukappiaraanerusut kisitsisit takutippaat. Taakkunani ikitsuinnaat ilinniartarput sulilertarlutilluunniit. Taakkuupputtaaq tarnikkut inuuniarnikkullu ajornartorsiuteqangaatsiartut.

Kisitsisilli taakkua iliuuseqarfiginiarlugit Mind Your Own Businessimi Natuk Rosen Fleischer politikikkut suleqatigiinnernullu pilersaarusiornernut ataqatigiissaarisuuvoq, Aviaaja Pedersen Lyngelu suliniutinik ataqatigiissaarisuuvoq.  

KNR-imi sulisup naapeqatigimmagit Air Greenlandimi ataatsimeeqqammerput. Timmisartortitseqatigiinnik nutaamik isumaqatigiissusioqqammerlutik.

- Inuusuttut nukappissat ilinniagaqalernissaat sulilernissaallu siullertut aallutaraarput. Mind Your Own Business suliffeqarfiaqqat aqqutigalugit anguniagassaannartuunngitsorli atukkanik pitsanngorsaaviuvoq pinaveersaartitsiviullunilu, suliffinnik aallarnisaaneq aqqutigalugu nukappissat inuttut suliatigullu ineriartortinneqarlutik, Aviaaja Pedersen Lynge oqarpoq.

Mind Your Own Business Nuummi suliffeqarfeeqqanik katillugit 16-inik januaari 2019-iilli pilersitsipput. Nukappissat arfinillit aqqaneq-marlullu akornanni amerlassuseqartut peqatigalugit suliffeqarfeeqqat marluk ukiut tamaasa pilersinneqartarput. Nukappissat suliffeqarfeeqqamik naqqaniit pilersitsinissaminnut ilinniariartorlutik sapaatip-akunneranut akunnerit marluk naapeqatigiittarput. Taakkua ineriartortitsineq, nioqqutissiorneq, nittarsaassineq nioqqutissiaminnillu tuniniaaneq ilinniartarpaat. 

Kajumissutsiminnik ikorfartuisut (venturepiloter) aamma suliffeqarfinnit ikorfartuisut illoqarfimmiut peqatigalugit niuernermut pilersaarusiortarput tunisassiaminnillu ineriartortitsinermut ikiorneqartarlutik. 

- Inuiaqatigiinni inuit nalinginnaasut kajumissutsiminnik ilitsersuisuupput, inuussutissarsiortuniillu aamma ilitsersuisoqarpoq. Taakku tamarmik inersimasuupput, suliffeqarfiup anguniagaanut ikiuuttut, assigiinngitsunittaaq tunuliaqutaqarput inuttut piginnaasatik assigiinngitsutigut atorlugit tuniseqataasartut, Natuk Rosen Fleischer oqarpoq.

Aviaaja Pedersen Lynge aamma Natuk Rosen Fleischer nukappissat ilagalugit workshopiniinngikkaangamik suliffeqarfinnulluunniit pulaanngikkaangamik Nuummi allaffeeqqaminniittarput, tassani ingerlatsinissamut aningaasaliisussanik ujartuisarput, suleqatinik qulakkeerisarput sumiiffimmilu ilitsersuisunik inuussutissarsiornermilu peqatinik atassuteqartarlutik – nukappissallu aqqusaassagaluarpata matortik ammatittuaannarpaat.  Assi © : Victoria Julie Schou / KNR

Illoqarfimmiut ikiuutileraangata

Mind Your Businessip attaveqaataasa amerleriapiloorneri Natuk Rosen Fleischerip Aviaaja Pedersen Lyngellu marluullutik nuannaarutigaat. Sapaatip-akunnikkaartumik ataatsimiinnerni kajumissutsiminnik ikorfartuisut peqataarusullutik nalunaarnikut saniatigut, inersimasunik kajumissaarneqanngikkaluanik takkuttoqakulasarpoq.

Ikiuunnissaminnik neqerooriartorlutik takkuttarput. Assersuutigalugu ilai nukappissat ikiorlugit suliffeqarfiutimik ilisarnaatissaanik ilusilersuiartoqatiginnillutik takkuttarput.

Nukappissat pillugit sumiiffimmi attaveqarfiit pitsaasut pissutigalugit Mind Your Own Business Nuummi pilersinneqarnera pitsaasuusoq, Aviaaja Pedersen Lynge isumaqarpoq.

- Nunatsinni ataatsimoorluni kajumissutsimik peqataasarneq nutaajungaatsiarpoq. Kajumissutsimik peqataasarneq siuarsarniarlugu suliniuterpassuupput, nalinginnaasunngortinniarneqarneralu aallunneqarpoq. Tassunga atatillugu inuit piumassusaat inuussutissarsiornermilu peqatigisaat pissarsiorferujussuusartut qujanartumik misigisarparput. 

Suliffeqarfeeqqat nutaat marluk aallarteqqammerput upernaamullu suliffeqarfeeqqamik naqqaniit aallarnisaaniarnermik ilinniartinneqassapput.

Nukappissat suliffeqarfimmik qanoq ittumik pilersitsissanerlutik siullermik isumassarsianik ineriartortitsinermut naapeqatigeeqqaassapput. Kingornagut ilitsersuisut attaveqarfigineqassapput taamaaliornikkut nukappissat ilitsersuisullu imminnut ilinniarniassammata. Ineriartortitsineranni workshopeqarlunilu suliffeqarfinnut pulaartinneqartarput. Tamanna nukappissanit nuannarineqarluartarpoq.

- Ilaanneeriarlutik atisat qarlittariit atorlugit takkuttarput. Tamannalu nuannerluinnartuuvoq. Suliffeqarfinnukassatillutik atorfilittut sassarnissartik pingaartittaqaat, taakkununngami pissanganartuummat, Aviaaja Pedersen Lynge oqarpoq.

Suliffeqarfinnut pulaarnerpassuit sulinerpassuillu kingorna, peqataanerup naggataani kingullertut suliaminnik saqqummiussipput, taakkualu naggataarutaasumik Business Awardertoqarnerani pisinnaasaminnik tamanik takutitsilluarfigalugit. Tassani suliffeqarfinniit peqataasut, kajumissutsiminnik peqataasut, ilaquttat, ikinngutit aappallu takkussuupput.

- Nukappissammi ilai oqaaseqarnissaminnulluunniit sapiullutik peqataalertarput. Tassanngaannaq tassani nikuillutik tanngassimaaqalutik, inuppassuit saanni suliaminnik saqqummiisarput. Tamannalu ingasalluinnarpoq, Natuk Rosen Fleischer oqarpoq nangillunilu:

- Aamma iluatsilluartumik misigisaqarsimanerat maluginiarnartarpoq. Business Awardseqarnissaanullu naapittagaat nukappissanut utertiffiginnillaqqissuupput iluatsilluartumik suliaqarsimanerannut takutitsivigalugit. Taava tassani suliaminnik tanngassimaarutiginningaartarput.

Nukappissat inuussutissarsiornermi peqatitik ilitsersuisutillu sanileralugit assingi allaffiup iigaani nivingapput.  Assi © : Victoria Julie Schou / KNR

Mind Your Own Businessimi peqataanermi suliat assersuutit saqqummersinneqaqqammersut Aviaaja Pedersen Lyngep aamma Natuk Rosen Fleischerip allaffiini nerriviisa qaaniipput.

Puussiaaqqat akimut ersittut fidgetinik assammiunik imallit arlalissuupput. Quppersagaaqqamik ilisarnaammillu peqqissaarussamik poortugaallutik. Suliffeqarfik UNFOCUSED-imi nukappiarpaalunnit sanaajupput. Assammiut qaleriit, uniffeerunnermi inussat atorlugit qalleq kaavisinneqarsinnaasoq. Uippakajaarnermi arsaaqqatut nutaaliatut taaneqarsinnaagunarpoq.

Nukappissat namminneerlutik aallussinissaminnut timimillu eqqissisimannginnerat misigisarneratigut isumassarsiaq aallarnerpoq. Taamaattumik ajornartorsiummut tamatumunnga ikiuutaasinnaasumik assammiumik tulluarsakkamik pilersitsipput. Taannalu nioqqutissiarilerpaat Nuummilu atisaarniarfimmi Bolt Lamarimi maanna tuniniarneqarpoq.

Nukappissalli tamakkerlutik eqqissisimannginnermik aallussilluarsinnaannginnermillu ajornartorsiuteqanngillat.

Naak Mind Your Own Businessimi peqataatitsinermi sullinniakkat aalajangersimasuugaluartut, nukappissat tunuliaqutaat assigiingitsorujussuupput.

Ilai pissanganarnera pissutigalugu peqataapput, allat ilinniagaqarnissaminnut, sulilernissaminnut piginnaanngorsarnissaminnullu angusaqarnissaminnik toraagaqartuullutik ikiorneqarnissamik pisariaqartitsillutik peqataapput. Taamaattumik Mind Your Own Business Majoriamik suleqateqarpoq.

Ilaqarpulli aamma allanik peqateqarnissamik taamaallaat pisariaqartitsisut.

- Aamma nukappiaalunnik ikinnguteqanngitsunik imaluunniit attaveqaateqanngitsunik peqarpugut, peqataasinnaanerlutik namminneerlutik saaffiginninnikuusunik, Natuk Rosen Fleischer oqarpoq.

Atassuteqaatit allannguinissamut pingaaruteqarput

Mind Your Own Business Nuummiittoq Tuborgfondetimit 2019-imi januarimiilli tapiissutisisarpoq, suliniartoqaqqinnissaanullu Atlantikup avannaanut aningaasaliissutitigut 1 millionit koruuninik tapiiffigineqaqqammerput.

Naallu danskit suliniutaatut aallarnerneqaqqaaraluartoq, inuiaqatigiinni mikinerusuni, kikkut tamarmik imminnut ilisarisimakkajuffianni iluaqutai Nuummiit malugineqarput.

- Atassuteqaatit maani qanissinnaaneri, nukappissallu illoqarfimmi naapissinnaaneri immikkut pisinnaatitaaffiuvoq, Natuk Rosen Fleischer oqarpoq.

Aviaaja Pedersen Lynge nangippoq. 

- Nukappissat pingasut peqataaqqammersut Majoriami ullumi naapippavut. Qanoq ingerlasimanerat qanorlu inneri pillugit oqaloqatigaavut, aallartissimanerilu takusinnaavagut. Nuanneqaaq. Peqataatitsinissamullu nutaarluinnarmut aamma ilannguttussanngorput, peqataarngaartussanut ikorfartuisunngussallutik. Saqqummiisussanngorutta aggersarneqassapput misigisaminnik oqaluttuariartorlutik.

Nukappissat Natuk Rosen Fleischerip Aviaaja Pedersen Lyngellu akornanni qanimut atassuteqaqatigiinnerat kisimi pineqanngilaq. Tamanna illoqarfimmioqatini aamma malugineqarsinnaavoq.

- Kajumissutsiminnik peqataasunit pissarsissutiginngikkaluarluguluunniit ikiuukkusuttunit aamma malugisarparput. Tamannaavormi aamma illoqarfitta pitsaalluinnaqutaasa ilaat. Piumassuseqartoqarnera akisussaaqataarusunnerallu malugineqarsinnaammat, Natuk Rosen Fleischer oqarpoq.

Aviaaja Pedersen Lyngemut Natuk Rosen Fleischerimullu qanimut atassuteqaatit atatitsisuupput. Nukappiaqqanut illoqarfimmiunullu.  Assi © : Victoria Julie Schou / KNR

Naammagittarneq, tatiginninneq – nukappissanullu uummateqarfiginningaarneq

Qanimut atassuteqaatitigut nukappissat qanoq innerinut malinnaasinnaaneq Aviaaja Pedersen Lyngemut Natuk Rosen Fleischerimullu pingaartorujussuuvoq.

Nukappiaqqanullu attaveqarluarneq sulinerminnut isumaqalersitsilluinnartuusoq, Natuk Rosing Fleischer oqaluttuarpoq

- Qanoq tunisisinnaatiginera takusinnaallugu uannut nuannersuuvoq. Aamma nammineq qanoq pissarsiaqaatigisartigineriga. Nukappissat ilisarisimalerneri ineriartornerallu takusinnaallugu tunisisorujussuusarpoq. Nuannerluinnartarporlumi! 

Ammasuunermiuna ulluinnarni suleriaasaannut aamma sunniuteqartuusoq.

Taannaagunarporlu ingerlalluartitsisuusoq, taakku isumaqarput. Nukappissat piumallerlutillu takkussinnaasarnerat kiffaanngissusiuvoq. Kasuttorpata matu ammajuaannarpoq.

- Tikkuartuisuunnginnitta ukkatarineqangaatsiarnera periaatsinut ilaanera pissutaaqataasoq isumaqarpunga. Takkukkaangata qujanartaqaaq. Takkutinngikkaangatalu maqaasinerarlugit sianerfigisarpavut. Ullormut amigaatigisimanerarlugit, Aviaaja Pedersen Lynge oqarpoq.

Kajumissisitsiniarnerummi assigiiginnarnissaa ajornaatsuinnaaneq ajorpoq, Natuk Rosen Fleischer nangippoq.

- Sammisaqaqataanerannimi kajumissuseerutissagaluarpata suliffeqarfeeqqat puiguumilaariarlugit inuttut ataatsimooqatigiissinnaaneq ukkatarilertarparput.

Iliuusiuvoq naammagittarsinnaanermik qanilaarnermillu pisariaqartitsiffiusoq, kisianni aamma angusaqarfiusartoq. Suliffeqarfeeqqammi ataatsimut suliaqarnermi ilaanni tunuartinneqarsinnaatillugit allannguineq aallartittarpoq. Atassuteqaatimmiuku suliniummik siuariartortitsisuusut. 

Natuk Rosen Fleischerip Aviaaja Pedersen Lyngellu Mind Your Own Business siunissami ingerlalluarnissaa neriuutigigaat qularutissaanngilaq.

- Illoqarfimmi allami aallartitsisinnaanissarput takorluugaraarput. Piffissallu ingerlanerani nunatta tamakkersinnaanissaa neriuutigaarput. Eqqissiivillutali aallartippugut, piffissallu ilaani illoqarfimmi allami misiliinissarput neriuutigaarput, ingerlalluarsinnaanersorlu takullugu, Aviaaja Pedersen Lynge oqaluttuarpoq.