Nutserisarnermut suliaq aaqqiivigineqartariaqarpoq
-Uissuummeqaanga piffissaq taama sivisutigisoq ingerlasimammat, inatsisillu Kalaallit Nunaanni atuuttut kalaallisut nutserneqaratik nalunaarutigineqarsimanngimmata. Inuiaqatigiinni tamat oqartussaaqataanerannik aamma eqqartuussiveqarnikkut ingerlatsiviusuni pingaaruteqarluinnarpoq innuttaasut oqaatsitik aallaavigalugit inatsisit atuuttut atuarsinnaassagaat. Enhedslistenimi Kalaallit Nunannut tunngasuni oqaaseqartartoq Line Barfod oqarpoq. Enhedslistenimiillu Statsministeri apeqquteqarfigineqalerpoq, qanoq taama pisoqarsimasinnaanersoq aamma ajornartorsiut aaqqiviginiarlugu qanoq iliuuseqartoqarnersoq, inatsisillu atuuttut Kalaallisut nutserneqarsimannginneri naalagaaffiit isumaqatigiissutaannik unioqqutitsinerunersoq paaserusuppaa.
Statsiministeri Lars Løkke Rasmussen suliamut tunngatillugu suli oqaaseqartissinnaasimanngilarput, soorlu aamma Kalaallit Nunaannut tunngasuni oqaaseqartartoq Flemming Møller feeriarnini pissutigalugu oqaaseqarsinnaasimanngitsoq. Konservativenili tupigusuutigineqarpoq, ajornartorsiut piffissaq taama sivisutigisoq ingerlareersoq aatsaat maluginiarneqarmat.
- Tupigusuutigineqarsinnaavoq nutserinissaq amigaatigineqartoq ukiut pingajuata affaa ingerlareersoq aatsaat paasineqarmat. Kisianni oqaatigisariaqarparput, sulineq pitsaasumik ingerlanneqartariaqarpoq. Inatsisit nalunaarutillu atuutinneqartut, atuuffigisaanni oqaatsit atorneqartut aallaavigalugit pissarsiarineqarsinnaasariaqarput, tamannalu iluarsineqartariaqarpoq. Konservativet Kalaallit Nunannut tunngasuni oqaaseqartartuat Tage Leegaard oqarpoq. Ajornartorsiummik saqqummiussineq Siumut sinnerlugu Folketingemut ilaasortamit Lars Emil Johansenimit tupaallaatigineqarpoq.
- Taanna suliassaq pingaartorujussuuvoq, taanna inatsit Kalaallit Nunaannut atuuttussaq aamma kalaallisut nutserneqarnissaa.
Taamaammat ukiorpassuarni rigsombudsmandip sioqqulluta landhøvdinngeqarfimmi suliarisarimavai. Aamma tupigusuutigaara ukiuni kingullerni suliaq tamanna unitsinneqarsimassappat, piaartumik naammassineqartariaqarpoq. tassami nunatsinni inatsisit naapertussagaanni kalaallisut allassimasussaapput, Lars Emil Johansen oqarpoq.
Lars Emil Johansenili isumaqanngilaq politikkikkut annerusumik iliuuseqartoqartariaqartoq naatsorsuutigaalu Rigsombudsmandip suliaq iluarsiivigissangaa.
- Nuannaarutigaara Rigsombudsmandi massakkut suliassaq naammassiniarlugu aalajangersimammat, taamaattumik immikkut qanoq iliuuseqaqqinnissaq pisariaqassanngilaq, Lars Emil Johansen oqarpoq.
Rigsombudsmandip KNR-imut nalunaarutigaa, inatsisit nalunaarutillu nutserneqareeriarpata nittartakkami ukiamut pissarsiarineqarsinnaalerumaartut.
