Uummannami umiatsiaararsortut: -Nutaamik talittarfittaartariaqarpugut
Uummannami talittarfik ataasiinnaavoq, tassanilu umiatsiat angallatillu angisuut pitoqqasarput.
Talittarfiup saniatigut umiatsiat angallatillu anginerit kangerlunni sissamilu pitoqqatinneqartarput.
Ole Møller ukiut 50-it sinnerlugit aalisartuuvoq, taassuma talittarfeqarnerup ajornartorsiutinngorsimanera isornartorsiorpaa.
-Talittarfeqarnikkut ajoraluartumik kinguussaaqqavugut, maani umiatsiarpassuanngornikuupput, Ole Møller oqarpoq nangillunilu
-Taamaammat talittarfeqarnikkut aaqqiinissaq piffissanngorsimasoq pisariaqalivissimasorlu isumaqarpunga.
Kangerlummi tulattariaqartartut
Naatsorsueqqissaartarfiup kisitsisaatai naapertorlugit Uummannami umiatsiat 2025-mi 328-upput kilisaatit aalisariutillu 95-iullutik
Kilisaatit aalisariutillu 2024-miit 2025-mut 35-nik amerleriarput, umiatsialli tallimanik ikileriarlutik.
Umiatsiaaqqat angallatillu anginerit kangerluk tulattarfiat anorlertillugu eqqugaasarpoq, tamannalu umiatsiaaqqanut ajoqutaasoq Uummannami aalisartut piniartullu peqatigiiffianni KNAPP-imi siulittaasup Malik Johansenip oqaatigaa.
-Umiatsiaaqqat ukiukkut kallussaaterujussuartaramik, sualummik kangerluk assorujuk umiatsiaaqqanut iluaakkami. Talittarfik maninnerumaartuusisarpoq kisianni ulikkaavittarluni.
Illoqarfiup ineriartorneranut iluaqutaassasoq
Nutaamik talittarfiliortoqartariaqarnera Inuutersuaq-Ulloriaq Løvstrømip inuit attaveqaqatigiittarfianni arlaleriarluni isummerfigisarpaa.
Uummannaq ukiukkut sikusarpoq, tamannalu aamma ajornartorsiutinngortartoq Inuutersuaq-Ulloriaq Løvstrømip oqaatigaa.
-Ukiariartornerani assarneq sikut umiarsualiviup iluanut pulaarartarput annertunerusumillu tassuunakkut tattoqisaanneq aamma pilersarluni.
Angallatit amerliartuinnaratik aamma alliartuinnarput tamannalu talittarfimmi tattoqisaannermi pissutaasut ilagigaat taanna isumaqarpoq.
Ukiuni tulliuttuni talittarfittaarnissaq Inuutersuaq-Ulloriaq Løvstrømip angorusuppaa, namminermi isumaqarpoq talittarfimmik anginerusumik pilersitsisoqarpat illoqarfiup ineriartorneranut aamma iluaqutaalissasoq.
-Tassuunakkut illoqarfitta annertuumik sunniuteqarfigisinnaavaa. Ilaatigut imaatigut nioqqutissanik pilersorneqarnikkut, angallatit tattoqisaaffiunatik talissinnaanissaat. Illoqarfiup iluani imaassinnaasoq aamma angallattoqalersoq taavalu imaatigut takornarissanik isumaginnittut aamma periarfissarissaarnerulerlutik.
Uummannami nutaamik talittarfiliortoqarnissaa Avannaata Kommuniani kommunalbestyrelsip ukiamut siunnersuutitut oqaluuserisassaanut ilaavoq.
