IA-p ajugaanera patajaanerunermik Danmarkimi kinguneqaqqugaat

Qinersinermi Inuit Ataqatigiit ajugaanerat Folketingimi partiinit arlalinnit iluarisimaarneqarpoq.

Kalaallit Nunaannut tunngatillugu oqaaseqartartoq, Martin Lidegaard, naalakkersuisunngortussani patajaanerusumik ingerlatsisoqassasoq siullertut kissaatigaa.

AAMMA ATUARUK Inatsisartunut qinikkat ukuupput

- Danmarkimut tunngatillugu, suleqatigiinnermik ineriartortitseqataarusuttunik naalakkersuisoqalerumaartoq neriuutigaara, taamaalilluta Kalaallit Nunaanni aningaasaliissuteqartartut amerlanerulersissinnaassavagut Danmarkillu nunanut allanut sillimaniarnermullu politikkianut sunniuteqarnerulersinnaanissaat anguniarlugu, taanna oqarpoq itisiliillunilu:

- Tassa Kalaallit Nunaat naalagaaffeqatigiinnerup iluani namminiilivisinnaanerulersikkumallugu, ukiorpassuarnili naalagaaffeqatigiissinnaassalluta neriuutigaara, taanna oqarpoq.

SF-ip Kalaallit Nunaannut tunngatillugu oqaaseqartartua, Karsten Hønge, qinersinerup inerneranik naammagisimaarinnipportaaq.

- Kalaallit Nunaata patajaannerusumik siunnerfeqalissasoq. Silaannaap pissusia, pinngortitaq, avatangiiseq inunnullu naapertuilluarneq ukkatarineqassasut, taanna Twitterikkut allappoq.

AAMMA ATUARUK IA borgmesteriutitaqarnerulersut

Enhedslistenip politikkikkut oqaaseqartartua, Mai Villadsen, Kalaallit Nunaata Parisimi isumaqatigiissummut ilaatinneqalernissaa IA-mit nalunaarutigineqarsimasoq maluginiarsimavaa. Tassani nunarsuarmi silaannaap kissakkiartornera killilersimaarniarlugu gassinik kissatsitsisartunik aniatitsisarnerup annikillisarneqarnissaa pineqarpoq.

- Ersoqatigiinnissaq eqqarsaatigalugu, minnerunngitsumillu silap pissusia pinngortitarlu eqqarsaatigalugit tamanna alloriarneruvoq pingaarutilik, taanna Twitterikkut allappoq.

Kalaallit Nunaannut tunngatillugu Venstrep oqaaseqartartua, Christoffer Aagaard Melsom, naalagaaffeqatigiinnerup iluani arlaqartuni suleqatigiinnerusoqarsinnaasoraa .

AAMMA ATUARUK Inuit Ataqatigiit Inatsisartunut qinersinermi ajugaasut

- Meeqqanut ikiortarialinnut tunngasunik IA siuttuulluni suliniuteqarusunnera misigereerparput. Kissaatigineqassappat tassunga sulineq nanginneqarsinnaassasoq isumaqarpugut, taanna oqarpoq.

Kalaallit Nunaanni peqqinnissaqarfimmut Danmarkimiillu Kalaallit Nunaannut aningaasaliissuteqarnerusinnaasunut tunngasuni suleqatigiinnerusoqarsinnaasoq, Ventrep oqaaseqartartuata aamma tikkuartorpaa.