Podcast: Nunatta nukissua coronamut ajugaavoq
- Coronap iliuuseqarfigineqarnera pillugu Kalaallit Nunaat nersualaartarialerujussuuvoq.
Taama oqarpoq Mie Møller, taassuma nunatta coronap tuniluunnerata nalaani iliuuserisimasaa misissorlugu Ilisimatusarfimmi Københavns Universitetimilu ph.d-nngorniutini illersoqqammerpaa.
Mie Møllerip podcasti Nunarsuup avannaanit ilisimasat (Viden fra verdens ende) immikkoortoq saqqummeqqammersoq peqataaffigaa. Taanna tassani oqaluttuarpoq nunatta covid-19-imik nunarpassuarnut allanut sanilliullugu sakkukinnerusumik eqqorneqarsimanera ataasiinnarmik nassuiaatissartaqanngitsoq. Sorpassuit pissutaapput, taassumali ilisimatusarnermini paasisani ”Kalaallit Nunaata nukissuanik” aallaaveqarnerarpai.
- Kalaallit Nunaata nunarsuarmi sumiiffigisani iluaqutigilluarpaa, nunarsuummi sinneranut ungasippoq. Oqartussattaaq iliuuseqapallapput, inuiaqatigiillu malitaannik killilersuutinik atuutilersitsipallapput, Mie Møller oqarpoq naqissusiillunilu.
- Taakku tamarmik ataatsimut Kalaallit Nunaata nukissuanik taaneqarsinnaapput.
Toquliivissorisut
Nunatsinni killilersuutit sakkortunerpaammata nunatta Danmarkillu akornanni timmisartuussinerit unitsinneqarput, inuiaqatigiillu akiuussusersorneqarnissaata tungaanut nualluutip tuniluunneranik annikinnerusitseqataalluni.
Naak coronap tuniluunnera nunatsinni anigorluarneqaraluartoq taamani pisut ilungersunarnerat Nuummi innuttaasut naapitatta eqqaamalluarpaat.
- Taamani pisut ernumanarlutillu annilaanganarput. Nunarput Danmarkilu matuneqariasaarput. Pikkunarnikooqaarlu, Helle Berg oqarpoq.
Johanne Heinrich Halsøeip nualluutip tuniluunnera pisutut nassuiaruminaatsutut eqqaamavaa.
- Ajorlunilu ersinarpoq, qanorluunniit taassanerlugu taamani nalunarpoq. Kisianni aamma kingumut eqqaallugu tissinarpoq.
Sooruna?
- Ilami toquliivissorigatta. Sinnarliornaqaaq eqqumiitsunillu eqqarsaateqarnarluni, taanna oqarpoq.
Ajorluinnartumik aarleqquteqarneq
Mie Møllerip nunatsinni corona pillugu ph.d.-liornera nalaatsornerinnaanngilaq. Nualluut Kinamiit nunarsuup sinneranut 2019-ip naalernerani 2020-llu aallartisimalaarnerani siaruaakkiartuaalerpoq, Mie Møllerilu Dronning Ingdridip Peqqissaaviani nakorsatut taamani sulivoq.
Taamaammallu taanna qanimut pisut akornanniikkami aarleqqutit aamma nunatsinni peqqinnissaqarfimmik artukkiinaveersaartitsiniarluni suliniutit misigai.
- Nualluut taama tunillaatiatigisoq Kalaallit Nunaanut anngukkaluarpat ajorluinnassaqimmat upalungaarsimanermut pilersaarusiortoqarpoq, pisussallu assigiinngitsut peqqinnissaqarfiup qanoq iliuseqarfigissanerai pilersaarusiarineqarpoq. Piffissami tassani sorpassuarnik allannguerujussuartoqarpoq, pisussallu nalunarluinnartut eqqarsarnaqaat, Mie Møller oqarpoq.
Nunatta coronap tuniluunnerata nalaani iliuuserisaa tusagaqarfiginerorusukkukku podcastimi nangeqattaartumi Nunarsuup avannaanit ilisimasat-ni immikkoortoq saqqummeqqammersoq ” Nunatta nukissua coronamut ajugaavoq” tusarnaarsinnaavat. Immikkoortut tamarmik KNR.gl-mi tusarnaarneqarsinnaapput, imaluunniit podcastinik tusarnaarfigisartakkanni.
Aallakaatitassianut nangeqattaartunut Carlsbergfondet aningaasaliisuuvoq, taakkulu kalaallisut danskisullu tusarnaarneqarsinnaapput.
