Nunatta ilisimaneqarnerulernissaa anguniarpaat

Maannakkumut filmit Kalaallit Nunanneersut imaluunnit Kalaallit Nunaannut tunngassuteqartut 30-t festivalimi takutinneqassapput. Suliniuteqartuupput danskeq/kalaaleq filimiliortartoq Ivalo Frank, Ungarnimioq Milena Nikolova kiisalu tyskeq Lill-Ann Körper, Humboldt Universitetimi ilinniartitsisuusoq. Isumassarsiarlumi pilerpoq Ivalo Frankip nammineq filmiliaata Humboldt Universitetimi takuteqqaarneqarnerani.

- Berlinimi filminik takutitseqattaartoqarneranut atatillugu kalaallit filmiliaasa peqataatinneqannginnerat sussaanngilaq, naak Berlinimi kalaallit filmiliaat soqutigineqaraluaqisut, pingasuullutalu oqaloqatigissutigeriartigu aalajangiupparput tamanna iliuuseqarfiginiarlugu. Taama oqarpoq Ivalo Frank. Tyskillumi Kalaallit Nunaannut soqutigisaqarnerat arlaleriarluni misigisimavaa.

- Soqutiginnittorujussuupput. Soorlulusooq Kalaallit Nunaat eqqarsaatigalugu amigaateqartoqartoq, taamaattumilluuna Humboldt Universiteti Kalaallit kulturiat, oqaluttuarisaanerat naalakkersuinikkullu inissisimanerat pillugu ilinniartitsissutissanik suliaqarsimasoq. Taamaattumik eqqarsaatersorneq kulturilu eqqarsaatigalugit soqutigineqartorujussuuvoq, Ivalo Frank oqarpoq.

Filmit filmeriartarfimmi tutsuiginartumi, Arsenalimi takutinneqassapput, tamatumalu kingorna Humboldt Universitetimi oqalugiarnermik oqallinnermillu naggaserneqassallutik.

- Kalaallit Nunaat siammasissumik sammissavarput, kisiannili ataatsimut isigalugu kalaallit filmiliaat annertunerusumik sammineqassallutik, Ivalo Frank nassuiaavoq.

Takutitseqattaarnermi kalaallit filmiliaat kulturiallu isiginiarneqarnerunissaat siunertarineqarpoq.

- Naak soqutiginninneq annertugaluartoq taamaattoq Kalaallit Nunaat pillugu inuit ilisimasakippallaarnerat misigisarpara, filmiliortoqartarneralumi allaat tupaallaatigineqartarpoq. Taamaattumilluuna ilisimasaqalernerunissaat siunertaringipput. Filmillumi inuiaqatigiit qanoq ittuussusaat pillugit tusagassiutitsialaapput pitsassuit, inuillu kulturiannik eqqarsartaasiannillu takutitsisarlutik, Ivalo Frank oqarpoq.

Aningaasalersorneqarnerali suli naammassineqanngilaq, aaqqissuussisullu maannakkorpiaq tamaviaarlutik aningaasaateqarfiit aningaasartuutissanik matusitinniarlugit ilungersuuteqarput.

Ivalo Frankilumi kalaallinut filmiliortartunut, ingammik Qaanaami taamaattoqarsimappat kissaateqarpoq. Maannakkumummi Qaanaaq kalaallit filmiliaannik takutitseqattaarnissami takuneqarsinnaanngilluinnarpoq, taamaattumillu inunnik tappavani filmiliorsimasunik ilisimasaqartoqarpat attavigerusuttorujussuuvai.

Aaqqissuisut attavigineqarsinnaapput Facebookip quppernerani Greenland Eyes alakkarneratigut.