Nunatoqqaminnukartinneqartarnerat takornartaanngilaq
Taama oqaaseqarput, arnap 31-nik ukiullip Danmarkimeersup, Pakistanimiunit kingoqqisup, sapaatip akunneri marluk matuma siornagut sakiminit aallaaneqarluni toqunneqareersorlu.
- Pisimasoq pisartorpassuit ilaannaraat. Qularutiginngilara arnarpassuit Danmarkimeersut, nunanit allanit kingoqqisut, mattusimaneqartartut nakuuserfigineqartarlutik pinngitsaalillugillu arneriffigineqartarlutik. Naak erseqqissumik ilisimanngikkaluarlugu ilimagaara arnat danskisut innuttaassuseqartut, angajoqqaamik nunagisimasaanni narrunarsagaajumanani toqunneqartartut, immikkut siunnersorti, Farwha Nielsen Danmarkimi qimarnguiit kattuffiineersoq oqarpoq.
Pakistanimiunut Danmarkimut nunasisunut siunnersorti atuakkiortorlu Mohammed Rafiq tamatumunnga isumaqataavoq:
- Arlaleriarluni taama pisoqartarsimanissaa qularutissaanngilaq. Arnat Danmarkimi innuttaasut tammaaneqartut tusarfigineqaqqinnikuunngitsullu misissuiffigigaanni naammattuugassaqassaaq, oqarpoq.
Nunanut allanut ministeeriaqarfimmi allaffiup pisortaa Uffe Wolffhechel oqarpoq, niviarsissat Danmarkimeersut nunanit allamiunit kingoqqisut tammaaneqartut imaluunniit angajoqqaamik nunagisimasaannut pinngitsaalillugit nuutsinneqartut pillugit “ukiumut arlaleriarlutik suliaqartarlutik.” Niviarsissat sulinngiffeqarnerminnut atatillugu angajoqqaamik nunagisimasaannut tikeraartinneqartarput. Ilaqutaallu Danmarkimut uteraangata pinngitsaalillugit uningatinneqartarput. Niviarsissallu Danmarkimut utertinniarnerat tamatigut iluatsinneq ajortoq oqaatigalugu.