Folketingip Nunanut allanut tunngasunut Aalajangiisartoqatigiivi Christiansborgimi marlunngornermi nalunaaqutaq arfinermut immikkut ataatsimiissapput.

Aalajangiisartoqatigiit pilersaarutaareersunik pisarnertut akuttuallaanngitsumik ataatsimiissapput, marlunngornermili ataatsimiinnissamut immikkut aggersaasoqarpoq, Nunanut allanut tunngasunut Aalajangiisartoqatigiit allatseqarfiat Ritzauimut paasissutissiivoq.

Ataatsimiigiaqqusissummi “Kunngeqarfiup USA-mut attaveqarnera” ullormut oqaluuserisassani kisimi allaqqavoq.

USA-p præsidentiata Donald Trumpip Kalaalit Nunaata aqulernissaanik kissaateqarluni oqarnerata kingorna ataatsimiinnissamut aggersaasoqarpoq.

Ataatsimiinnermi danskit naalakkersuisuniit nunanut allanut tunngasunut ministeri Lars Løkke Rasmussen (M) aamma Illersornissamut ministeri Troels Lund Poulsen (V) peqataassapput.

USA-p “isumannaatsuunissaanut atatillugu Kalaallit Nunaat pisariaqartillugu” Donald Trumpip ullualuit matuma siorna oqaatigaa.

Præsidenti Kalaallit Nunaannut tunngatillugu iliuuseqassanersoq pillugu oqaaseqaateqaqqinnissani itigartitsissutigaa.

“Nuna Nato-mut ilaasortaq nunamik allamik saassussippat, taava suut tamarmik unissapput. Sorsunnermik ingalassimatitsinissamut, akerleriinnermut ingalassimatitsinissamut Nato pilersinneqarpoq”, Ministeriuneq Mette Frederiksen (S) ataasinngornermi oqarpoq.

“Kinaluunniit USA-mut Kalaallit Nunaata siunissaa pillugu sorsukkumanavianngilaq”, Præsidentip Illorsuani atorfilittat pisortaata tullersortaa Stephen Miller, danskit nalunaaqutaat malillugu marlunngornermut unnuaani oqarpoq.

- USA Natomi pissaaneqarnerpaavoq. USA-p Issittumi nunap immikkoortua illersorsinnaassappagu Natollu soqutigisai illersorlugit, Kalaallit Nunaat USA-mut ilaasariaqartoq erseqqippoq, Stephen Miller CNN-imut oqarpoq.

Kalaallit Nunaata Naalakkersuisuini siulittaasup Jens-Frederik Nielsenip Amerikamiut isumaliuutaat akueriumanngilaa.

- Oqalunnerit taamaattut naammaleqaat. Nanertuiniarnerit unitsillugit. Ernumasaarinerit unitsillugit. Tiguaaniarnernut sinnattuaqinerit unitsillugit, Jens-Frederik Nielsenip Facebookimini sapaammi allappoq.

/ritzau/