Nuna tamakkerlugu meeqqanut neqerooruteqalerpoq

Meeqqat inuusuttullu najugaqarfigisartagaat ornittagaallu Mælkebøtten Nuummiittoq meeqqanik Kommuneqarfik Sermersuuminngaannersuinnaanngitsunik najugaqarfigineqartalissaaq.
Allattoq Tikaajaat kristensen
maajip 20-at 2014 10:05

Mælkebøtten 2006-imi ammarpoq, nunalu tamakkerlugu neqerooruteqartalernissaq siunertaajuarsimavoq.

Tamannalu iluatsippoq, ukioq manna maajip aallaqqaataaniit Nunatsinni kommunit tamarmik meeqqat Mælkebøttenimut allatsissinnaanngormatigit.

Mælkebøtten meeqqanut sammisassaqartitsiviuvoq nutaanik pilersitsisinnaasoq, meeqqanullu peqquteqavillutik angerlarsimaffimminni najugaqarsinnaanngitsunut qimarnguiviulluni, meeqqanullu tarnikkut, inuttut isumaginninnikkullu pisariaqartitsisunut ikiuisarfiulluni.

- Ullut arlaanni nuna tamakkerlugu sullissisinnaalernissarput suliap siunertariuarsimavaa. Maannalu Mælkebøtten tunngavilerluarneqareermat meeqqat sullissagut Kommuneqarfik Sermersuuminngaannersuinnaajunnaarnissaanut nukissaqalerpugut, Mælkebøttenimi pisortaq Kirsten Ørgaard oqarpoq.

Mælkebøtten sammisassaqartitsiviup, ulloq unnuarlu ornittakkallu saniatigut najugaqarfik Ilasiaq ingerlataraa, tassani meeqqat sumiginnakkat najugaqarput. Maannalu inuusuttuaqqanut najugaqarfimmik Kapisilinnilu aallaarsimaarfissamik immikkullu angerlarsimaffigisartagassamik pilersitsiniarluni sulissuteqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq