Norgemi ikuallattoqarnerata kingorna qatserinermut suli ullut qulit atorneqarnissaat ilimagineqartoq

Norgemi illoqarfimmi Krokstadelvami ikuallattoqarnerata kingorna suli ulluni qulini qatserisoqassasoq, qatserisartut naatsorsuutigaat.

Tamanna politiit aviisimut VG-mut ilisimatitsissutigaat.

Tallimanngornermi ikuallanneq pilersoq suli qamisarneqartup kingorna illoqarfimmi illorpassuit isasoorput. 

-Sumiiffimmi suli sivisuumik suliaqartoqassaaq. Tamanna nunap suli uunangaatsiarneranik pissuteqarpoq, politiit immikkoortortaqarfianni Syd-Østimi ingerlatsinermut pisortaq Ståle Fuglås VG-mut oqarpoq. 

Sivisuumik panernarnera, anori kiisalu illut qanittuararsuullutik inissisimanerat pissutigalugu ikuallanneq sukkasuumik siaruaassimassasoq, Norgemi oqartussaasut siusinnerusukkut ilisimatitsissutigaat.

Illut ilaanni gassimik puiaasaqarsimanerup ikuallanneq siaruapallatsissimagaa nalilerneqarpoq.

Illut 100-t sinnerlugit ikuallannerup kinguneranik piuneerupput.

Oqartussat suli najuuttut

Politiit, qatserisartut Norgemilu angerlarsimaffimmi illersornissaqarfiup sulisui illoqarfimmi qanittuanilu unnuaq ataasinngornerulernerani nakkutilliillutik ikuallattumillu qamiterillutik suliaqartut, Ståle Fuglås oqarpoq.

-Nunaannarmi ikuallarujussuartoqarsimatillugu ikuallanneq pilertorsinnaasarpoq. Tamanna nakkutigissallugu pisariaqarpoq, nunami suli uunartoq annertoorujussuuvoq, ingerlatsinermut pisortaq oqarpoq. 

Innuttaasut arlallit sumiiffimmi killilersuiffigineqartunut iserniarsimammata politiinit unitsinneqartariaqarsimapput.

Krokstadelva Oslop kujataata kitaatungaani Drammenip qanittuaniippoq.

Illut saniatigut illoqarfiup eqqaanni orpippassuaqarfiit aamma ikuallapput.

Qatserisartut najugaqarfinni kiisalu orpippassuaqarfiit sinaanni ikuallannerit annikinnerit arfineq-pingasunit qulinut amerlassusillit unnuaq ataasinngornerulernerani qamissimagaat, VG allappoq.