Nivi Olsen timersortartut akikinnerusumik angalasalernissaat siunertaralugu Air Greenlandimut attaveqarniartoq
Timersornermut naalakkersuisoq Nivi Olsen Air Greenlandimut attaveqarniarpoq timersoriat angalasarnerisa akisunerujussuat pillugu. Akikillisaataasinnaasunik Air Greenland saqqummiussivoq.
Kalaallit Nunaanni timersoqatigiit kattuffianni 2025-mi aningaasat 39 millioner koruunit kaaviiaartinneqarput. Taakkunannga 18,2 millioner koruunit kattuffinnut agguaanneqarput. Tamanna takuneqarsinnaavoq GIFip naatsorsuutaani ileqquusumik ataatsimeersuarnermi sapaatip akunnera kingulleq pisumi.
- Aningaasaliissutit amerlanerpaartai Air Greenlandimut tuttarput unamminernut assigiinngitsunut peqataalluni angalanernut. Isumaqarpunga tamanna apeqqusernartuusoq, timersornermut Naalakkersuisoq Nivi Olsen KNR-imut oqarpoq.
- Taamatut isummerpunga Air Greenland inuiaqatigiit pigisarimmassuk taamaattumik sooq timersornermut aningaasaliissutit amerlanersaat tassunga tuttassappat timersornerup siuarsarneranut atorneqaratik, Nivi Olsen oqarpoq.
Taamaattumik Air Greenland attaviginiarpaa timersornermullu aningaasaliissutit pillugit kisitsisit saqqummiullugit akikillisaataasinnaasullu oqaluuseralugit.
- Soorunami Air Greenland timersornermi angalasarnerit akii pillugit Nivi Olsenimik ataatsimeeqateqarnissamut ammavoq. Pilersitsiffiusumik ataatsimiinnissamut qilanaarpugut tassanilu eqqartorlugu qanoq pitsaanerpaamik timersorneq tapersersorsinnaanerlugu, piujuaannartitsinermut attaveqarnermullu Air Greenlandimi pisortaq Inga Dora G. Markussen Nivi Olsenip KNR-imut oqaaseqarneranut akissuteqarpoq.
Kikkut tamarmik suleqataassapput
Taassuma erseqqissarpaa amerlasuukkaarluni angalanermut akikillisaanissamut periarfissaqareersoq. Periarfissaq taanna taaguuteqarpoq Ilik.
- Akikillisaavigineqarnissaq anguneqassappat immersugassaq atorlugu qinnuteqartoqassaaq. Sioqqutsinerugaanni akikillisaavigineqarnissaq ilimanarneruvoq – pingaartumi angallaffiunerpaap avataani pissappat tassami taamatut akikillisaavigineqarnissaq angallaffiunerpaamut sanilliullugu periarfissaginnerummat, Inga Dora G. Markussen oqarpoq.
Timersornermut Naalakkersuisoq Nivi Olsen Air Greenlandimik ataatsimeeqateqarnissamut aamma qilanaarpoq.
- Isumaqarpunga inuiaqatigiit tamarmik timersornerup inerisarnissaanut pisussaaffeqartut. Air Greenland tassani aamma ilaavoq, Nivi Olsen oqarpoq.
Naalakkersuit Air Greenlandillu ataatsimeeqatigiinnissaat Kalaallit Nunaanni timersoqatigiit kattuffianni qilanaarineqarpoq.
- Nuannaarutigivarput timersortartut angalasarnerat pillugu oqaloqatigiinnissamut suliniartoqarmat. Puigussanngilarput aamma aningaasarparujussuit Arctic Umiaq Linemut aamma Disko Linemut atorneqartarmata, kisianni ilumoorpoq aningaasaliissutit amerlanerpaartaat Air Greenlandimut atorneqartarmata, GIF-imi siulittaasoq Claus Nielsen oqarpoq.
