Nivi Olsen meeqqanut, inuusuttunut, ilaqutariinnut nunamullu namminermut aamma naalakkersuisunngortoq

Nivi Olsen (Demokraatit) ulapingaatsialissaaq.

Taanna ilinniartitaanermut, kultureqarnermut, timersornermut ilageeqarnermullu naalakkersuisooreerpoq. Taanna Meeqqanut, Inuusuttunut, Ilaqutariinnut Nunamullu Namminermut Naalakkersuisutut aamma toqqarneqarput.

Naalakkersuisut tusagassiuutinut nalunaarummi allappoq.

Mads Pedersenip meeqqanut, inuusuttunut, ilaqutariinnut nunamullu namminermut naalakkersuisutut decembarip qulingiluaanni tunuarnerata kingorna taanna toqqarneqarpoq.

Qaammatit arfineq-pingasut atuutereerluni tunuartoq

Mads Pedersen (IA) naalakkersuisut nutaat siorna upernaakkut qinersinerup kingorna saqqummiunneqarmata naalakkersuisunngorpoq. Taanna avataaniit naalakkersuisunngortinneqartoq apriilimiit decembarip tungaanut naalakkersuisuuvoq.

Taanna Danmarkimut decembarimi angalareernermi kingorna tunuarpoq.

- Nuliaralu facetimeluta ernera angajulleq iserpoq ilisisimallutik. Facetimerluta nuliama ernera eqikkaa takuara qissaserlungalu. Tassaniissinnaannginnama, ernera pakkussinnaannginnakku. Tassani aalajangerpunga tunuarniarlunga.

Mads Pedersenip oqarnera naapertorlugu tunuarnissani piffissami sivisuumi eqqarsaatigisimavaa, sulininimi peqqissutsiminut sunniuteqartoq malugaa.

Mads Pedersen naalakkersuisut piffissap sivikitsup ingerlanerani tunuartut aapparaat. Bentiaraq Ottosen (A) pisortat suliffissarsiorfiat nutaaq pillugu siunersiuisoqareernerata kingorna siorna novembarimi tunuarpoq.