Nikkup aalajangiusimaannarpaa: Apriilip qulingiluaanni erfalasut qiteqqusimasarneri atorunnaarli
- Partii Inuit eqqortuusorinngilarput, naalagaaffiup Danmarkip peqqunera piinnarlugu, uagut inuiattut isumaqartinngisagut qulaatiinnarluta atuutsinniarneqarneri, Nikku Olsen siulittaasullu tullia Aannguaq Poulsen, tusagassiutinut nalunaarummi allapput.
Nick Nielsenip apriilip qulingiluaanni erfalasut qiteqqusimasarneri illersorpaa
Erseqqissaassutigaat sorsunnersuarmi kingullermi ajunaarsimasut eqqorneqarsimasulluunniit pineqanngimmata, taamaattoq oqalilluartoqarnera maluginiarsimallugu. Apriilip qulingiluaani erfalasut qiteqqusimatinnerisa kalaallillu inuiattut pingaartitaasa imminut ataqatigiinnginnerarpaat.
- Ilumoorsinnaava ullaakkut iterluta erfalasoq qiteqqusimasoq takugutsigu tupalluta eqqarsassasugut: "Kinamitaavaana toqusimasoq?", aperipput.
Ullumikkut ileqqut nuannersumut nukissaqarnerusumullu saatinneqartariaqartut Partii Inuit siulittaasua isumaqarpoq.
- Sorsunnersuup aningorneqarsimanera nuannaarutinngortinneqarluni erfalasumik amusisoqartalernissaa peqqinnarnerusoraara.
