Nerrivimmi arsaarartut nunanut unammisartut Islandiliassapput

Timersortartut allat Bermudamut Island Gameseriarniartut, nunatsinni nerrivimmi arsaarartartut pikkorinnersaat Islandiliassapput. Nerrivimmi arsaarartartut nunanut kiattukaqataanatik, Islandimi unammiuaarnermut peqataaffigilluarneqartussamut peqataajartussapput.
Allattoq Peter Troelsen, Simon Uldum
juulip 03-at 2013 04:02

Unammiuaarnerni juulip sisamaanit arfineq pingajuanut ingerlanneqartussami unammeriaatsit tamaasa unammissutigineqassapput, tassalu kisimiilluni, arnat angutillu marlukkuutaarlutik kiisalu arnat angutillu akuleriillutik marlukkuutaarneri. Unammiunaarneri islandimiut, savalimmiormiut, danskit norgemiullu nunanut allanut unammisartui aamma peqataassapput.

Nunanut allanut unammisartut qangali katersuupput, taamaammat nunanut allanut unammisartut sungiusaasuat Tommy Jørgensen ikiortaalu Petrus Brønlund unammisartut unamminissaat qilanaarisupilussuuaat.

-Unammisartut nutaat ukiormanna peqataasussat amerlapput, aammali sungiussisimalluartunik ilaqarlutik. Nutaat ilinniartissavaat, aamma inuusunnerit angajulliunerusunut Islandimi unammisassatik qanoq ilungersortitsisinnaatiginissaat takussallugu qilanaarivara, Tommy Jørgensen nassuiaavoq.

Angutit nunanut allanut unammisartut tassaapput Ivik Nielsen, Bat 98, Aqqalu Nielsen, Bat 68 aamma Dines Hammeken, Ukaliatsiaq 93.

Arnat nunanut allanut unammisartut tassaapput Arnannguaq Lyberth, Bat 98, Nukannguaq Søholm, Bat 98 aamma Bodil-Mona Frederiksen, NNAP.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq