Akerliussutsimik takutitsineq Nanortallip atuarfiata silaannaluttuarnera qatsullugu meeqqat atuarumajunnaartut

Nanortalimmi meeqqat atuarfianni atuartut pingasunngorpat ilanngullugu atuarumajunnaarput. Atuarfiup silaannaluttuarnera atuartut angajoqqaavisalu qatsullugu ataasinngormat akerliussutsimik takutitsipput.

-Atuarfitta silaannaa pitsaangitsorujussuanngornikuugami sivitsortumik. Taamaalilluta meeqqatta peqqissusaannut ilinniartitsisunullumi eqquinerloqqalerami, Nanortallip Atuarfiani siulersuisuini siulittaasoq Kathrine Eugenius oqarpoq nangillunilu,

-Atuarfiup siulersuisuisa angajoqqaanik ataatsimiititsinerat aallaavigalugu angajoqqaat aalajangeeqatigaarput taamaaliussalluta. Ulluni pingasuni atuarumajunnaartitsissalluta, taavalu akerliussutimik takutitsissalluta ullumikkut. 

Atuarfittaarusuttut

Atuartut 175-iupput, ilinniartitsisut 20-ullutik. Akerliussutsimik takutitsisut atuarumajunnaartullu Nanortalimmi nutaavimmik atuarfiliortoqarnissaa piumavaat.

-Atuarfik nutaaq qinnutigaarput, taavalu tusaaneqanngitsutut misiginerput sivitsulerami taama atuarfipput annikitsumik iluarsineqalaaginnartarluni. 

Atuarfiup silaannaluttarnera pissutigalugu atuartut ilinniartitsisullu peqqiillioraluttuinnartut Kathrine Eugenius oqarpoq. 

-Ukua nappaatinngorsinnaasut astma, pronkitis, taavalu aamma eksemertut amerlinikuupput. Ataavartumik pigilertussaagamikku naammaginagu ingerlariaqqittariaqassaagut qanittukkut iliuuseqartoqanngippat, Kathrine Eugenius oqarpoq.

Iluarsartuunneqartaraluartoq

Atuarfik siorna iluarsartuunneqaraluartoq Kommune Kujallermi inerisaanermut ataatsimiitsitaliami siulittaasoq Maaliaaraq Nielsen KNR Radiop aallakaatittagaani Ulluni Makkunanimi oqarpoq. 

-Illup, illutaatigut ajoqutit iluarsartuunneqarput 2025-mi aasakkut. Taavalu uku ventilationit silaannarissarfinnut tunngasut aamma suliarineqallattaajuarlutik. Maannamut taaku iliuuserineqarsimapput.

Atuartut atuarumajunnaarlutillu akerliussutsimik takutitsisariaqalersimanerat, ataatsimiitsitaliap siulittaasuata uggoraa.

-Soorunami ajuusaarnarpoq tassunga killittoqarnera. Atuarfik, atuartut sulisullu tamarmik peqqinnerpaamik inissisimatikkusuppagut. Aammalu tassunga killikkusunnanngissimagaluarpoq. Una killiffik ajuusaarnarpoq ilungersunarlunilu.

Ukiup atuarfiusup naannginnerani Nanortallip Atuarfiata siulersuisui, angajoqqaat ilinniartitsisullu ataatsimeeqatiginissai Maaliaaraq H. Nielsenip neriorsuutigaa.