Nalunaarasuartaateqarnermi aqutsisut it-lerinermik suliffeqarfik kisermaassisussaatitaanermik unioqqutitsisutut unnerluutigaat

Nalunaarasuartaateqarnermi aqutsisut it-lerinermik suliffeqarfik Inu:it politiinut unnerluutigaat.

Aqutsisut it-lerinermik suliffeqarfiup nalunaarasuartaaserivik pillugu inatsit unioqqutsissimagaa isumaqarput. Aqutsisut tusagassiuutinut nalunaarummi allapput.

- Suliffeqarfik Namminersorlutik Oqartussat kisermaassisussaatitaaneranik unioqqutitsisimasorigatsigu politiinut unnerluutigaarput, Nalunaarasuartaateqarnermi Aqutsisut allaffianni pisortaq, Louise Restorff Jacobsen KNR-imut itisiliivoq.

Nunatsinnimi nalunaarasuartaatitigut atortunik kiffartuussinernillu atuisartunut tassa ilinnut uannullu Tusass kisimi tuniniaasinnaavoq.

Allatut oqaatigalugu, Tusass qaammataasakkut Starlink-ikkut, Elon Muskimit pigineqartumit attavimmik kisimi tuniniaasinnaavoq.

Taamaakkaluartorli Inu:it qaammataasamut Starlinkimut antennemik pilersitsivoq, antennelu aqqutigalugu tuniniaaqqissimalluni.

Tusass ullumikkut kisermaassisussaatitaasoq

Nunatsinni nalunaarasuartaatitigut atortulersuutinut attaveqaatinullu ammalerulersitsisoqarsimannginnera nunanut amerlanerusunut sanilliullugu allaaneruvoq. Ammanerulersitsisoqannginnissaa toqqarneqarnikuummat Tusassip nalunaarasuartaatitigut kiffartuussineq kisermaassisussaatitaaffigigaa, taanna oqarpoq.

Taamaammat aqutsisut it-lerinermik suliffeqarfik oqaatigineqartutulli politiinut unnerluutigaa. Suliarlu maanna eqqartuussivikkoortinneqassaaq. Suliaq eqqartuussivimmi suliarineqalissanersoq, Nalunaarasuartaateqarnermi aqutsisut inatsimmik unioqqutitsisoqarsimaneranik oqaaseqarnerat eqqortuunersoq politiini unnerluussisussaatitaasut isumaqatigineraat apeqqutaavoq.

Taamaammat maanna susoqarnissaa nalunarallarpoq.

KNR-ip Inu:it oqaaseqartinniarsaraa.