Spiralilersuisimanermut tunngatillugu: Naleraq ukiaanerani ataatsimiinnerit sioqqullugit immikkut ittumik ataatsimeeqqusisoq

Naleqqap partiit tamaasa immikkut ittumik ataatsimeeqatigerusuppai, ataatsimiinnerlu ’Inuiaat kalaallit nungusarneqarsimappat’-mik qulequtarineqassaaq.

Partii tusagassiuutinut nalunaarummi allappoq. 

- Takorluugarput tassaavoq nunasiaataanerup nalaaniit maannamut iliuuserineqarsimasut sammineqarnissaat. 

Kiisalu Inatsisartuni partiit qanoq ingerlariaqqikkusunnertik pillugu isummersussapput, Pele Broberg tusagassiuutinut nalunaarummi allappoq.

- Uagut taamaaliorneqartuusugut qanoq isumaqarnitta erseqqissarneqarnissaa pingaartorujussuuvoq. Soqutiginagu nipaattumik akuersaaginnassaagut imaluunniit qanoq iliussaagut? Tamanna ersersinneqarnissaa pingaaruteqartorujussuuvoq. Kalaaleqatigut kisiisa pinnagit nunarsuarmioqatigullu aamma pillugit, Pele Broberg KNR-imut oqarpoq. 

Piffissalerneqanngitsoq

Partiip partiit qasseriarlutik apeqquteqarsinnaanerat killilerneqassanngitsoq tusagassiuutinut nalunaarummi taamaammat siunnersuutigaa. Oqaatigerusutatik tamaasa oqaatigisinnaasariaqarpaat, taanna allappoq.

- Siornatigut pisimasut erseqqissarneqarnissaat siunissatsinniippoq, saammaasseqatigiinnissarlu eqqartoraanni ilumoortoq avaqqutaarneqarsinnaanngilaq, Pele Broberg oqarpoq. 

Ilumoortoq saqqummiunneqartariaqarpoq, politikerillu isumaat aamma saqqummiunneqartariaqarlutik. Suliaq pisariaqarpat aatsaat eqqartuussivikkoortinneqarsinnaavoq, naalagaaffiup allap nunatta Danmarkimut suliassanngortitsinissaanut ikiorpagu, politikeri isumaqarpoq. 

- Kissaatiginngikkutsigu pisinnaanngilaq, taamaammat partiit qanoq isumaqarnerisa paasinissaat kissaatiginerippullu pingaaruteqarpoq, Pele Broberg oqarpoq.  

’Suut tamarmik ammasumik eqqartorneqarnissaat anguniarlugu assammik (Inatsisartunut naalakkersuisunullu aaqq.) isaassivugut’, Pele Broberg tusagassiuutinut nalunaarummi taama naggasiivoq.