Naleqqap Aqqaluaq B. Egede tatigiunnaaraa

Partii illuatungiliuttoq Naleraq aningaasaqarnermut naalakkersuisumut, Aqqaluaq B. Egedemut, tatiginnikkunnaartoq, Naleqqameersoq Jens NapâtôK’ soraarnerussutisiaqalernissamut aaqqissuussinermut peqataasussaatitaanerup allanngortinnissaanut ataasinngormat oqallinnermi nalunaarpoq.

Aqqaluaq B. Egedep pissusilersuutaa naalakkersuisunut ilaasortat ataqqinnittussaatitaanerannut naapertuutinngitsoq Naleqqamit isumaqarput.

Aqqaluaq B. Egedep Naleraq soraarnerussutisiaqarlernissamut aaqqissuussinermut peqataasussaatitaanerup oqallisigineqarnerani arlaleriarluni tunngavilersuuteqannginneraraa, isummanik saqqummiussinnginneraraa ikinnerussuteqarlunilu oqaaseqaateqarsimannginneraraa Naleqqamit isumaqarput.

Tamannalu eqqunngitsoq Naleraq isumaqarpoq. Taamaammat Aqqaluaq B. Egede naalakkersuisunut ilaasortat Inatsisartunut eqqortunik paasissutissiisussaatitaanerannik naammassinninngitsoq Naleqqamit isumaqarput.

- Naleraq Naalakkersuisunut ilaasortaq Aningaasaqarnermut Naalakkersuisoq tatigiunnaarlugu nalunaaruteqartariaqarpugut, isumaqaratta Aningaasqarnermut Naalakkersuisup Inatsisartut sulinerat suusupagalugu aammalu Inatsisartut ilaasortanut pissusilulluni Naalakkersuisut ataqqinnittuusussaaneranut pissusilersuutaa naapertuutinngilluinnarmat, Naleqqap tatiginnikkunnaarneranut tunngavilersuummi allaqqavoq.

Tatiginnikkunnaarnerat soraarnerussutisiaqarnermut oqallinnermut tunngaannanngitsoq, aammali Inatsisartunut ataqqinninnginnermut tunngassuteqartoq taassuma ilanngullugu oqaatigaa. Aqqaluaq B. Egedemi Inatsisartut suliarinninnerannik soqutigittaattumik malinnaasimanngitsoq, Naleqqamit aamma isumaqarput.

Aqqaluaq B. Egede isornartorsiuutinut isumaqataanngitsoq

Tamannali naalakkersuisoqatigiit partiivinit isumaqataaffigineqanngilaq. Ataatsimiinneq unikkallareersoq, naalakkersuisoqatigiit attaviitsorlu Aqqaluaq B. Egedemut suli tatiginnittut Demokraatineersoq Pipaluk Olsen naalakkersuisoqatigiit attaviitsorlu sinnerlugit oqarpoq.

- Naalakkersuisoqatigiit attaviitsorlu Aningaasaqarnermut Naalakkersuisoq Inatsisartut sammisanut sulinerannut ilisimaarinnittutut suleriaatsimullu ataqqinnittutut isigaat, taamaattumillu Naalakkersuisoqatigiit attaviitsorlu Aningaasaqarnermut Naalakkersuisoq tatigaat, Pipaluk Olsen oqarpoq.

Naleqqap tatiginnikkunnaarnermik taasititsinissamut siunnersuutaa taamaalilluni pinngitsoortinneqarpoq.

Aamma Aqqaluaq B. Egedep nammineerluni Naleraq tunngavilersuuteqarsimannginnerarlugu oqarnermut isumaqataanani oqaatigaa. Aamma Naleraq aningaasaqarnermut akileraartarnermullu aataatsimiititaliap isumaliutissiissutaani oqaaseqaateqanngitsoq, Aqqaluaq B. Egedep erseqqissaatigaa.

Naalakkersuisunut ilaasortamut tatiginnikkunnaarnermik maanna ataatsimiinnermi aappassaanik nalunaaruteqartoqarpoq. Naleqqammi Siumullu ilinniartitaanermut, kultureqarnermut, timersornermut ilageeqarnermullu naalakkersuisoq, Nivi Olsen, tatigiunnaarlugu maajimi siusinnerusukkut nalunaarutigaat.

Naalakkersuisoqatigiinni partiit Nivi Olsenimut tassani mianersoqqussuteqarput, sulili tatitagulu erseqqissaassutigalugu.