Naggueqatigiit Inuit siuttuat: Siunissaqarluarpugut
Nunat issittumiittut Canadami maanna isiginiarneqaleraluttuinnarput, siunissamimi isumalluutigineqartussat tamaaniimmata.
Aamma isumalluutinut naggueqatigiit Inuit isiginninnerat, ukiuni kingullerni allanngoriaateqarsimaqaaq.
Allannguuterpassuit pillugit Inuit Tapiriit Kanatami siulittaasoq Terry Aalla niuernermik saqqummersitsinermi oqalugiartunut pingaarnernut ilaavoq.
- Inuit avataaniit takkuttut aalajangiisuuallaarsimapput, maannali naggueqatigiit Inuit Canada tamakkerlugu kattussimasut ataatsimoorussaminnik ersarissumik saqqummiisinnaalerput. Kattuffik Inuit Tapiriit Kanatami aqqutigalugu nunanilu tamalaani ICC aqqutigalugu oqaaseqartarlutik, Terry Aalla oqarpoq nangilunilu:
- Canadap 40 procentia siaruarsimalluta nunagaarput, nunalu Indiatut annertutigisoq najorlutigu. Aamma naggueqatigiit Inuit Canadamiittut affaat 25-t inorlugit ukioqarmata siunissaqarluarpugut, Terry Aalla oqarpoq.
Taassumali ajornartorsiutit ersarissut aamma takusinnaavai.
- Illoqarfinni nunaqarfinnilu ajornartorsiutinik akiorniagassarpassuaqarpugut, inissaaleqineq, inuussutissanik naammattunik peqarnissaq, ilinniagaqannginneq isumannaatsumillu peqqissutsimik isumaginninnissaq, aammattaarli nutaanik isumassarsiorsinnaavugut, suliffissanik nutaanik pilersitsisinnaalluta imminullu tatiginerulerluta, Terry Aalla oqarpoq.
Ajornartorsiutit tamakku pissutigalugit aatsitassarsiornermut isummat allanngoriartortut taassuma takusinnaavaa.
- Isumalluutinik atuinissaq akerlerinngilarput, uagulli piumasaqaatitta tunngavigineqarnissaat piumasaraarput, taamatummi ineriartortitsisoqarnerani sunniuteqaqataarusuppugut, Terry Aalla oqarpoq imalu naggasiilluni:
- Issittup illersorneqarnissaani inuit tamaani najugallit illersornerisigut pitsaanerpaamik illersuisoqarsinnaavoq. Taamatullu illersuiniarnermi pitsaanerpaassaaq, inuit tamaaniittut aningaasarsiornikkut inooqatigiinnikkullu namminiileriartornermut ineriartornerini tapersersorneqarpata, tamatumalu peqatigisaanik kulturerput, pingaartitavut ileqqutoqqavut tamakkiisumik ataqqineqartariaqarput, Akilinermi naggueqatigiit Inuit siuttuat Terry Aalla taama naggasiivoq.
