Naammaqaaq! Inuiaat Trumpi akuersaanngikkaat
Nunatsinni illoqarfinni arlalinni inuit arfininngormat katersuupput, USA-p præsidentianut Trumpimut paatsuugassanngitsumik oqariartuuteqarlutik: Naammaqaaq – Nok er nok!
Akerliussutsimik takutitsinissamut aaqqissuisuusoq Orla Joelsen amerlasuut peqataanissaat kissaatigalugu ulloq sioqqullugu KNR-imut oqarpoq taamaalillutik ”Trumpip aammali amerikamiut paasissagaat Kalaallit Nunaat tiguneqarsinnaanngimmat”.
Kisimiilluni taamatut misiginngitsoq erseqqilluinnarpoq. Nuummi inuit 1000-t tungaanut amerlassusillit, oqaatsinik pikkunartunik allagartarsualisarlutillu erfalasutsinnik nassataqarlutik peqataapput.
Misigisaq pikkunarpoq silaannaq suaartartunik qilaatersortumillu sajukulaarpoq. Akerliussutsimik takutitsinerni taama amerlatigisut takkuttarneri qaqutigoormat, allaanngilaq peqataasut oqaluttuarisaanermut ilanngunneqalerlutik malugigaat.
Qilaatersortartut niffakuni portusuuni qulliullutik, nunatsinniit nunanillu allaniit tusagassiortunik unguneqarsimasumi akuttoqatigiissumik qilaat katuarpaat. Sumiiffimmi nipi qatituutut ataatsimut tillernertut siaruarpoq akerliussutsimillu takutitsineq aallarnerlugu.
Kingunitsianngua naalakkersuisut siulittaasorigallagaat Múte B. Egede (IA) sassarpoq. Isikkua pimoorusserpasippoq nipaalu ersarilluinnarluni. Issiup ataani Erfalasorput qullarsimaajutigalugu erseqqissumik oqalulluni aallartippoq:
- Ataatsimoornermik takutitsinerput inuiattut nukissaraarput. Kalaallit Nunaat kalaallit pigiuartussaavaat. Kinguariit qaqugumulluunniit uagut tatissanngilaatigut!
Katersuuttut qiimmattaatigaat. Aamma Demokraatini siulittaasoq Jens-Frederik Nielsen naalakkersuisunngornissamut isumaqatiginninniarnerit ulapputigigaluaqalugit peqataavoq.
– Amerikamiit oqallorissaarneq assuarnartumillu oqalunneq nunatut inuiattut ataatsimoornerput imatut takutipparput!, taanna suaartarpoq, inuiaallu akillugu suaartaapput - Kalaallit Nunaat, Kalaallit Nunaat, Kalaallit Nunaat!
Tusaaneqanngillat
Tamatuma kingorna inuppassuit aalajangersimasut illoqarfiup aqquserngitigut amerikamiut konsuuleqarfiata tungaanut ingerlaaqatigiinneqarpoq. Tassani amerikamiunut takutikkusuppaat - eqqissisimasumik - Kalaallit Nunaat kalaallit pigigaat.
Konsulaati sirnatigut taama malugineqanngisaannarpoq. Illulli ilua nipaqanngilluinnarpoq.
Illup saavani amerikamiut erfalasuat Stars and Stripes anorimik erfalarusaartaraluartoq peerneqarsimavoq. Igalaakkullu takuneqarsinnaavoq illup iluani aalalaartoqanngitsorluunniit.
Tusaaneqanngikkaluarunilluunniit akerliussutsimik takutitsisut qulalersinneqanngillat.
Silaannaap nillertup seqinnarissumi allaaqqissuarmi inuiaat ilummut anersaarput. Taamaaleriarlutik nipit ataasiusutut nipeqarlutik erinarsorlutik aallartipput:
Nunarput utoqqarsuanngoravit.
