Naalakkersuisutut taaneqartut sisamat atuuffigiligartik nutaaq oqaaseqarfigigaat

Inatsisartuni ullumi upernaakkut ataatsimiinnermi naalakkersuisunut ilaasortat nutaat sisamat toqqarneqarput.

Taakku tamatuma kingorna atuuffigilikkaminnut nutaanut pissanganeq, maniguunneq qilanaarnerlu oqaatigaat.

- Akisussaaffik annertoorujussuaq tigullugu nalunngilara. Taamaammat maniguunnarpoq, nalunagu unamminartorpassuit suliassat assigiinngitsut, Iddimanngiiu Jensen Bianco (IA), Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisunngortoq oqarpoq.

Pingaarnersiuinerit nutaat

- Ulluinnarni massakkut unamminartorpassuit, angallannermut assersuutigiinnarlugu, nalaappagut. Ingammik aamma avinngarusimasuni, Iddimanngiiu Jensen Bianco avinngarusimasumit Tasiilameersoq oqarpoq, nangillunilu:

- Avinngarusimasut aamma ukkatarinissaat uanga nammineerlunga takorloorpara, uanga nammineq avinngarusimasuninngaanneerama, nalunagillu pissutsit ilaatigut qanoq ilungersunartigisarnersut. Ineqarnermut unamminartorpassuit aamma tassaniittut qularinngilara aamma suliassama annertuut ilagissagaat.

Maritha Brobergip (A) Isumaginninnermut, Suliffeqarnermut Ilaqutariinnut Nunamullu Namminermut Naalakkersuisunngortup atorfimmi nutaamiilernissani suliassallu iserfiginissaat qilanaarinerarpai:

- Suliap iserfiginissaa siullertut isumagissavara. Nutaarluinnaavunga. Malinnaagaluaraanniluunniit iserluarnissaq pingaaruteqarpoq, taanna oqarpoq.

Avatangiisinut, Pinngortitamut, Nukissiutinut, Ilisimatusarnermullu Naalakkersuisunngortup, Jørgen Rosbachip (D) suut qilanaarinerpaanerai aperineqarami taassuma ‘suliassaqarfiit pissanganartut’ soorlu ilisimatusarnermut tunngasut aamma nukissiuteqarnermut tunngasut tassunga datacenterit aamma nukissiutit mingutsitsinngitsut qilanaaralugit oqaatigai.

- Inatsisartutut assigiinngitsut taakkua tikilaartarnikuullugit naalakkersuisut isaannik suliassat tigunissaat pissanganarpoq.

Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisunngoqqammersup, Mariane Paviasen Jensenip (IA) meeqqat, inuusuttut naligiissitaanerlu naalakkersuisoqarfimmik aqutsinissaminik pingaarsiorneqartussatut oqaatigai.

- Inuiaqatigiit tamatta ataasiakkaarluta inuugatta. Taannalu ersarissartuarnissaa aamma attattuarneqarnissaa sulissutiginissaa, taanna oqarpoq, nangillunilu siulimi Naaja Nathanielsenip pinerlunnermik inatsisip nunatsinnit akisussaaffigineqalernissaanik suliaqarnera nangissallugu oqaatigaa.

Pingaarutilinnik suliassaqartut

Kingullertut minnerunngitsumillu Nunanut allanut, Inuussutissarsiornermut, Aatsitassanullu Naalakkersuisunngortup, Múte B. Egedep (IA)  atuuffimmi nutaami aallartinnissani qilanaarinerarlugu pingaarutilinnik suliassaqarnerarpoq.

- Qilanaaraakka suliaqarfigissallugit. Suliassaqarfiit annertuujupput, aamma ingerlatsilluarsimasunik naalakkersuisoqarsimapput. Taakkualu suliarisimasaat toqqammavigalugu massakkut ineriartorteqqissallugu qilanaaraakka.

- Anguniagaqarattami pingaarutilimmik tatineqarnitta nalaani, taanna oqarpoq, nangillunilu:

- Aalajangiisinnaassuserput kinguaatsinnut aamma ingerlateqqinneqassasoq, allat nunarput pigilersinnaannginnamikku.

- Qulakkiigassat pingaarnerpaat tassaapput, massakkut killiffigisatsinni nunattalu tatineqarnerata nalaani taassuma anigorneqarnissaata qulakkeerneqarnissaanut sulinissaq, taanna oqarpoq.

- Aammali nunanik ikinngutinik aammalu iligiit akornanni pitsaasumik isumaqatigiissuteqarsinnaanissaq, nunatsinnut pitsaanerpaarpaamik ineriartuutaalersussanik toqqammaviliisussanillu. 

- Pisariaqartipparput inuussutissarsiornikkut aammalu aatsitassarsiornikkut siuariartornissarput. Taamatuttaaq aamma pingaartipparput, nunanik allanik suleqateqarluarnissarput. 

- Nunatta issittuleqqusaannermi taama qitiusumik inissisimanerani aammalu nunarsuarmi pissaanilissuit unammilerneranni qitiusumik inissisimanitsinni uagut puigorneqarnata inuiattut maani tusaaneqarlutalu aamma aalajangiisinnaassusitta pingaartinneqartuarnissaa taakkua qulakkiigassatta pingaarnersaasut ilagaat. Suliassarpassuupput, qilanaaraakkalu, Nunanut allanut, Inuussutissarsiornermut, Aatsitassanullu Naalakkersuisunngortoq oqarpoq.