Naalakkersuisut Uummannami innuttaasut kaffillernermi ilassigaat

Uummannap timersortarfianut iseraanni oqallippaluttut tusaaneqarsinnaapput.

Naalakkersuisut siulittaasuata Avatangiisinullu naalakkersuisup timersortarfimmi sisamaniit arferngup qeqqata tungaanut kaffillernerat pivoq, innuttaasullu politikerit taakkua marluk illoqarfik pillugu illoqarfimmilu ilungersunartut pillugit oqaluussinnaavaat.

Jørgen Rosbachip elværkip ikuallannerata pissutaa nassaarineqarsimasoq tikilluaqqusinermini saqqummiuppaa. Tamanna ilutigalugu Uummannami eqqagassalerinerup pitsanngorsaavigineqartariaqarnera aamma eqqaavaa.

Avannaata kommuniani borgmesteri, Lars Erik Gabrielsen, eqqaavilerinerup pitsanngorsaavigineqarnissaa pillugu oqaloqatigisimallugu aamma oqaatigaa.

Jens Frederik Nielsen Jørgen Rosbach oqalugiareermat naatsumik oqalugiarpoq.

- Tusarnaarnissarput siunertaralugu maaniippugut. Soorunalimi ilungersunarsinnaasut pillugit aamma tusagaqarusuppugut kisiannili aamma nuannersut pillugit tusagaqarusuppugut, Jens Frederik Nielsen oqarpoq.

Oqalugiartoqareermat ammasumik  oqaloqatigiittoqarpoq, innuttaasut naalakkersuisunut tassani apeqquteqarput.

Niuerneq, eqqakkanik isumaginninneq, innaallagissiorfiup ikuallannera peqqinnissaqarfillu ilaatigut sammineqarput.

Innuttaasut 30-t missaanniittut kaffillernermut peqataapput.

Naalakkersuisut Ikerasammut Saattunullu aqagu ingerlaqqissapput, taakkunanilu innuttaasunut aamma kaffisoriaqqusissallutik.