Naalakkersuisut aasaanerani nalunaaqutaq 2028-mi atorunnaarsinniaraat

Naalakkersuisut Kalaallit Nunaanni aasaanerani nalunaaqutaq atorunnaarsinniarlugu suliniuteqarneq taperserpaat.

Tamanna Naalakkersuisut siulittaasuata Jens-Frederik Nielsenip (D) akissuteqaataani Sermitsiami marlunngornermi allaaserineqartumi atuarneqarsinnaavoq.

Inatsisartut illuatungiliuttut Kalaallit Nunaata nalunaaquttap allanngortinneqarnissaa pillugu inatsisissatut siunnersuutaat marlunngornermi aappassaaneerpaat.

Inatsisartuni amerlanerussuteqartut aasaanerani nalunaaqutaq atorunnaarsinniarlugu UTC+2-miittuarnissaq kissaatigaat.

Jens-Frederik Nielsenip naalakkersuisullu tamanna siunnersuutigaat.

- Taamaattumik Naalakkersuisut nalunaarummik nutaamik saqqummersitsinikkut aasaanerani nalunaaqutaq atorunnaarsinniarlugu kissaat naammassiniarpaat.

- Allannguut januaarip aallaqqaataani 2028-mi atuutilertussaavoq, taamaalilluni inuiaqatigiit allannguummut piareersarnissaminnut pitsaanerpaamik periarfissinneqassapput, akissuteqaammi allassimavoq.

Oqallisigineqaqattaartoq 

Tamanna nunatsinni nalunaaqquttap siunissami ukiuunerani nalunaaquttap-akunnerini pingasuni aasaaneranilu nalunaaquttap-akunnerini sisamanik Danmarkimit nikingasalernissaanik isumaqarpoq, Danmarkip EU-llu aasaanerani nalunaaqutaq suli atormassuk.

Kalaallit Nunaanni nalunaaquttap-akunnerata immikkoortuanik toqqaaneq oqallisaajuarpoq.

Politikerit piffissap allanngortinnissaa 2022-mi isumaqatigiissutigaat.

Taamaaliornermi USA-p Europallu nalunaaqutaat assigiinngissutaannik qulakkeerinissaq siunertarineqartoq taamanikkut oqarput.

Piffissaq nutaaq marsimi 2023-mi atuutilerpoq, tamatumalu kingunerisaanik Kalaallit Nunaanni ukiuunerani nalunaaqutaq oktobarimi 2023-mi allanngortinneqanngilaq.

Piffissaq allanngormat Kalaallit Nunaat piffissamit nunap immikkoortuini atorneqartussaasumit allaanerulluinnartumik nalunaaqutaqalerpoq.

Illuatungiliuttut inatsisissatut siunnersuutit marluk marlunngornermi oqaluuserineqartussat atorlugit tamanna allanngortinniarpaat.

Inatsisit taakku marluk maajip 15-ianni pingajussaaneerneqassapput, taamaalillunilu amerlanerussuteqartut itigartissavaat.

Naalakkersuisut aasaanerani nalunaaqutaq atorunnaarsinniarlugu nalunaarummik nutaamik qaqugu saqqummiussiumaarnersut akissummi allaqqanngilaq.

/ritzau/