Naalakkersuisoq: Qulisanik arsaattarfittaarnissamut aningaasaateqarfinniit Danmarkimiillu aningaasanik pissarserusuttoq
Kalaallit Arsaattartut Kattuffiat KAK nunatsinni arsaattarfiit qulisanngortinneqarnissaannut suliniuteqarpoq.
Arsaannerit sivitsornissaasa saniatigut aamma Concacafimut ilaasortanngornissamut tunngavilersuutitut atorneqarsinnaapput.
Airdomet pullattagaapput perlukkaluaraangat, aputeqaraluaraangat issikkaluaraangalluunniit taakku atorlugit silami arsaattoqarsinnaavoq.
KAK-p kommunit Namminersorlutillu Oqartussat peqatigalugit Finlandimeeqatigiissimanerat KNR-imit siornatigut allaaserineqarpoq. Finlandimiinnerminnilu qulisat pillugit paasisaqarput.
.Mette Arqe-Hammekenip (N) Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Nivi Olsen (D) qaammatip siuliani arlalinnik apeqquteqarfigaa.
Apeqquteqarnermini paaserusuppaa naalakkersuisut taakkununnga pullattakkanut qanoq pisortatigoortumik polikkeqarnersut.
Aningaasassaaleqineq
Airdomet qanoq ittut apeqqutaallutik ataaseq 20-miit 50 millionit koruuninik akeqarpoq. KAK-p KNR-imut siorna paasissutissiissutigaa.
Danmarkimi aningaasanut inatsimmi Kommuneqarfik Sermersuumi ataatsimik airdome-iliortoqarnissaanut 4 millionit koruuninik immikkoortitsisoqarpoq.
Nivi Olsenip Mette Arqe-Hammekenimut akissuteqaammini nunatsinni arsaaffiit airdomeilersornissaannut kissaatigineqartut tamaasa nunatta karsiata akissaqartinngikkai paasissutissiissutigaa.
- Suliniut KAK-mit saqqummiunneqartoq akuersaarpara, taamatuttaarli oqaatigineqartariaqarpoq aningaasaqarnikkut maannakkut pissutsit timersortarfiillu pioreersut qanoq issusaat eqqarsaatigalugit sanaartugassatut suliniutit ataatsikkut suliarineqarsinnaanngimmata, naalakkersuisoq allappoq.
Aningaasaateqarfiit avataaneersut danskillu naalakkersuisui
Kommunit ineriartortitsinissamut, pilersitsinissamut najukkamilu timersornikkut atortunik soorlu illoqarfinni nunaqarfinnilu airdomeeqalernissaanut aningaasalersuinissamut pingaartumik akisussaaffigigaat, Nivi Olsen itisiliivoq.
Naalakkersuisorli avataaneersunit aningaasalersuisoqarnissaanut periarfissarsiorpoq. Saniatigut aamma Danmarkimi ministeriusimasunut saaffiginnippoq.
- Suliaq tamanna ingerlatiinnassavara, aningaasalersuinissamut periarfissarsiorlunga suliniutillu soorlu nunatsinni airdometut ittut piviusunngortinneqarnissaannut tunngavissiilluarniarlunga, naalakkersuisoq allappoq.
- KAK-p avataanit aningaasalersorniarneqarnissamut suliniutaanik tapersersuivunga suliniut taamaalilluni allanik suleqateqarnikkut piviusunngortinneqarsinnaammat.
