Naalagaaffimmit tapiissutit Atassummit qaffatsinneqarusupput: Namminiilivinnissaq qaninnerulissaaq

Nunatta aningaasatigut ajornartorsiulinnginnissaa anguniarlugu naalagaaffimmit tapiissutit annertusarneqassapput. Palle Christiansen, Demokraatit sinnerlugit 2009-mit 2011-p tungaanut aningaasaqarnermut naalakkersuisuusimasoq, sapaatip-akunnerata siuliani taama oqarpoq. 

Maannalu Atassut siunnersuummut tapersiilluni ilannguppoq - nangaassutilimmilli.

Politikerit aningaasanik atuipilunnginnissaat siunertaralugu peqqinnissaqarfimmut, ilinniartitaanermut ineqarnermullu immikkoortortaqarfinnut aningaasanik toqqaannartumik agguaanneqartussanik aningaasaateqarfinnik pilersitsisoqarnissaanik Palle Christiansenip oqariartuuteqarnera isumaaqataaffigigaluarlugu, naalagaaffimmit tapiissutit marloriaatinngorlugit qaffaannarneqarnissaat Atassummit isumaqataaffigineqanngilaq. 

- Nunatta karsiani aningaasat tassanngaannaq 4 milliardinik amerleriaraluarpata aningaasat naleerutissapput. Taamaattumik politikkikkut aalajangiinerit siunissaq ungasinnerusoq eqqarsaatigalugu iluaqutaanngitsut pinngitsoortinniarlugit aningaasat silatusaartumik atorneqartariaqarput, Aqqalu C. Jerimiassen, Atassummi siulittaasoq oqarpoq.

Naalagaaffimmit tapiissutit qaffanneqarnissaat pillugu Danmarkip oqaloqatiginissaa naalakkersuisuni eqqartorpisiuk? 

- Soorunami partiit naalakkersuisooqataasut oqaloqatigeqqaassavavut. Palle Christiansenilli nalagaaffimmit tapiissutinik qaffaanissaq pillugu oqariartuutaa Atassummit maannamut taperserparput. 

Aningaasat amerlanerusut aaqqissuusseqqinnerillu

Soraarnerussutisiaqalertartut amerliartortillugit, innuttaasut ikiliartortillugit peqqinnissamullu aningaasartuutit qaffakkiartortillugit Naalagaaffiup Aningaaserivissuata aamma Kalaallit Nunaanni Aningaasaqarnermut Siunnersuisoqatigiit ukiuni qulini aningaasaqarnerup patajaatsuunissaa qulakkeerniarlugu „annertuumik aaqqissuusseqqinnissaq“ piumasarisimavaat.

Aamma naalagaaffimmit tapiissutit qaffanneqarnerat pissutigalugu politikerit aaqqissuusseqqinnermik suliaqarnerminnik nangaassuteqalersinnaanissaat Palle Christiansenip nassuerutigaa.

Politikerit aaqqissuusseqqittariaqartut, tamannalu ilutigalugu Danmarkimit aningaasat amerlanerusut – assersuutigalugu soraarnerussutisiassanut isumaginninnermullu iluaqutissanut – tunniunneqartariaqartut, Aqqalu C. Jerimiassen isumaqarpoq.

- Juullip inuatut iliorluta aningaasanik inuiaqatigiinnut agguaassanngilagut. Silatusaartumik atuissaagut.

Namminiilivinnissamut aqqutissaq

Danmarkimilli aningaasanik amerlanerusunik tunissuteqartoqarnissaa akerleriissutaaqaaq, tamannalu Aqqalu Jerimiassenip nassuerutigaa.

Danmarkimulli aningaasaqarnikkut qaninnerusumik attaveqarneq namminiilivinnissamik anguniagaqarnermut akerliussasoq taanna isumaqanngilaq.

- Imaanngilaq Danmarkimut qaninnerulissasugut, siunissamulli pitsaanerusumik aningaasaliinissamut periarfissiissaaq, taamaalillutalu namminiilivinnissamut qaninnerulissaagut.

Politikerit ilaasa siunnersuut maluginiarsimagaat sammisarli oqallisigissallugu mianernartuusoq Palle Christiansenip eqqaavaa. Partiit allat siunnersuut qanoq qisuariarfigaat, isumaqarpit tamanut ammasumik oqaaseqarnissaminnut nangaasut?

- Partiit allat sinnerlugit akinianngilanga, qularinngilarali partiit ilaat ataaseq siunnersuut pillugu isumaqataanngilluinnassasoq, partiip aqqanik taasaqarani oqarpoq.