Naalagaaffeqatigiit siuttui tusagassiortunut Savalimmiuni sassarput

Sillimaniarneq Nunanut Allanut, Sillimaniarnermut Illersornissamullu Politikikkut Attaveqarnermut Ataatsimiititaliami ullumi ataatsimiittoqarpoq, ataatsimiinnerup saniatigut naalakkersuisuni siuttuusut pingasut Aksel V. Johannesen, Mette Frederiksen aamma Jens-Frederik Nielsen maanna tusagassiortunut sassarput.

Savalimmiuni lagmandi aallarniivoq:

- Suleqatima maani nikorfaqatigineri nuannaarutigaara, Aksel V. Johannesen oqarpoq.

- Ammasumik unneqqarissumillu oqaloqatigiippugut, taamaallaat suleqatit qanilluinnartillugit anguneqarsinnaasumik, taanna oqarpoq.

Oqaloqatigiilluarneq pillugu isumaqatigiinneq

Kinguninngua qallunaat ministeriunerat aallarniutitut oqaaseqarpoq

- Nunarsuarmi eqqissiviinneruleraluttuinnartumi inuunerput pissutigalugu naapittarnerput akulikinneruleraluttuinnarpoq, Mette Frederiksen oqarpoq.

- Europami NATO-mi soorunalumi Avannaani ataqatigiissaagut, Mette Frederiksen oqarpoq.

Illersornissap qullersaa aatsaavissuaq siullermeerluni peqataavoq, tamannalu nunarsuup eqqissiviinneranik pissuteqarpoq.

- Attaveqaasersuutinut pisariaqartunut aningaasaliinerorusuppugut, Mette Frederiksen oqarpoq.

- Qallunaat tungitsinniit Issittumi Piginnaasanik Annertusaanermik isumaqatigiissut 2 naammassingajalersoq pillugu iliuuseqarnerujumavugut.

Naalakkersuisut siulittaasuattaaq isumaqataavoq.

- Ullumi oqaloqatigiinnerni naalagaaffeqatigiinnerup nutarterneqarnissaanik aamma imaqarpoq. Aaqqiissutissanut kinguneqartussanut politikkikkut kajuminneq, aaqqiissutissat kinguneqartussat pillugit nassaarniarnissamut oqaloqatiinnerput nuannaarutigaara, Jens-Frederik Nielsen oqarpoq.

Naalagaaffeqatigiinnermit avissaarnissaq pillugu apeqqut

Apeqqut siulleq Savalimmiormiut tusagassiorfianniit apeqqutigineqarpoq, tassani Aksel V. Johannesen avissaarnissaq pillugu aperineqarmat.

- Danmarki suli naalagaaffeqatigiinnarusupparput, kisianni nunanut allanut politikkikkut pisinnaatitaaffeqanngilagut – pingaartumik aningaasaqarnikkut, soriarsinnaanata aamma niuernermi isumaqatigiissuteqarniarneq ajornarluni.

Mette Frederiksen Savalimmiut lagmandiata oqalunnera nangiinnarlugu oqaaseqarpoq:

- Nunagisap nammineq piumasaq malillugu ineriartortikkusunneqarnera ataqqilluinnarpara. Taamaattumik tamassuma tungaadnut alloriarnerit pingaarutillit arlallit piffissami kingullertigut aalajangiiffigaavut, Mette Frederiksen Issittumi Siunnersuisoqatigiinnut aamma Nunat Avannarliit Siunnersuisoqatigiivinut pasitsassaariutigaluni oqarpoq. 

- Allannguisoqarnissaa pillugu Kalaallit Nunaat Savalimmiulluunniit kissaateqarnerminnik oqaaseqanngillat kisianni kunngeqarfiumuna Issittumi siunnersuisoqatigiinni nunat taakkua marluk allatut inissisimalernissaat kissaatigigaa.

Ineriartorneq Trumpip aallartitippaa?

Kalaallit Nunaaa ineriartulerneranik Trumpi aallartitsisuunersoq pillugu Jens-Frederik Nielsen aperineqarpoq.

Toqqaannartumik akinngilaq, oqarlunili:

- Danmarkip nunatsinnik aningaasaliinerunissaminut piareersimavoq, tamannalu ukiorpassuarni naammattumik kivinneqarsimanngitsoq, akisussaassuseqarnermik takutitsineruvoq. Assigiinngissuterujussuaqarpoq inuiaqatigiinnilu naligiinngiinneqarluni.

- Kalaallit Nunaat ineriartorusuppoq, aningaasaqarnermigut, nukittunerusumillu toqqammaveqalerusulluni. Tamannalumi maanna oqaloqatigiissutigineqarpoq.

Siunissami suleqatigiinnerup qanoq isikkoqarnissaa pillugu, siuttut taakkua pingasut erseqqissaanerusinnaanersut aperineqarput, siuttunilli pingasuusunit akissutigineqartut assigiipput.

- Oqallilluarnerit aallartereerput, tusagassiortulli saavanni isumaqatiginninniarnavianngilagut.