Naak akit akitsoraluttuinnartut: Aningaasaqarnerit pitsaanerulerpoq
Politikerit, immikkut ilisimasallit tusagassiuutillu aningaasaqarnermik oqaluuserisaqaraangata sunarpiaq pineqarnersoq nalunarsinnaasarpoq.
Marluk pineqarnerusarput: Inuiaqatigiit aningaasaqarnerat politikerillu pisortat aningaasaataannik aqutsinerat – nunatta karsia.
Aningaasaqarnermut Siunnersuisoqatigiit nalunaarusiaanni kingullermi allaqqasut naapertorlugit, inuiaqatigiit aningaasaqarnerat pitsaasumik ingerlasoq, KNR ungasinngitsukkut allappoq.
Nalunaarusiamili sammineqartut pingajuat tassaavoq, inuinnaat aningaasaqarnerat.
Aningaasaqarnermut Siunnersuisoqatigiit siulittaasuata, Torben M. Andersenip, aamma tassani siuariartoqarsimasoq oqaatigaa. Tamatumalu ukiuni tulliuttuni siuariartorfiuinnarnissaa naatsorsuutigineqarpoq.
- Amerlanerpaanut, tamanuunngitsorli, kisianni amerlanerpaanut isertitaviit, tassa akileraareerluni pisisinnaassutigisinnaasat, ullumi 2021-mit 2022-milu amerlanerupput, Torben M. Andersen oqarpoq.
Inuilli kisitsisinik taama isiginnilernissaata tungaanut piffissaq sivisusinnaavoq.
Akileraarnikinneruneq akissarsiaqarnerunerlu
Aningaasaqarnermut siunnersuisoqatigiit oqarnerat naapertorlugu, inuiaqatigiinni akigititat tamarmik ataatsimut isigalugit januaari 2022-mit 3,2 procentimik akisunerulerput.
KNR-ip politikerit innaallagiaqarnermut, imeqarnermut kiassarnermullu akinik ukioq manna aallarnerfigalugu ukiunullu marlunnut tulliuttunut atuuttussamik 22,5 procentinik akitsuinerat, ukiup siuliata ingerlanerani allaaserereerpaa. Ikummatissallu akii ukiup siuliani aamma akitsoriataarput.
Akit akitsoriartornerisa 3 procentimik ukioq manna aappaagulu akikillilaarnissaat maanna naatsorsuutigineqarpoq.
- Taamaattumik pisisinnaassutsimut, ilaqutariit inuuniutissanut missingersuusiaannullu soorunalimi annikinnerulersitsissaaq, Torben M. Andersen oqarpoq.
Taamaakkaluartoq innuttaasup pisisinnaassusaa agguaqatigiissillugu pitsaanerulersinneqarpoq - aningaasanik qanoq atugassaqartiginerat qanorlu pisisinnaatiginerat.
Akileraarnikinnerunerit, soorlu Suila-tapit tunngaviusumillu ilanngaatit qaffasinnerunerit taamaattoqarneranut annerusumik pissutaapput.
Akileraarutinik ikililiinerit innuttaasut 82 procentiinut ukiumut agguaqatigiissillugu 8.800 koruuninik aningaasaateqarnerulersitsipput.
Ammattaaq inuiaqatigiinni akissarsiaritinneqartartut nalinginnaasumik amerlanerulerput.
- Kisianni soorunalimi assigiinngissuteqartorujussuusinnaasarput. Naak agguaqatigiissikkaanni ajunnginneruleraluartoq, suli eqqugaanerluttoqarpoq, Torben M. Andersen oqarpoq.
- Maannali qiviarutsigu amerlanerit akinik akitsuinernut malinnaapput.
Aningaasaqarnerup qanoq paasineqarnera
Pisisinnaassuseqarnerulernerup inuit aningaasaqarneq pillugu paasinnittariaasaannut immaqa malunniutinngitsoorneranut peqqutaasut ilagaat, akit ukiuni kingullerni akitsoriartornerisa sammineqarnerat.
- Aningaasat naleerukkiartornerat oqallisigineqarnikooqigami taamaattumik tamanna immaqa isiginiarneqarnerpaajuvoq, Aningaasaqarnermut Siunnersuisoqatigiit siulittaasuat oqarpoq.
Taamaattumik taanna isumaqarpoq, akileraarnikinnerit aningaasarsiaqarnerulernerillu puigorneqakkajuttartut.
- Imaassinnaavoq sakkortulaartumik oqarnerusoq, kisianni puigorneqartarpoq. Aningaasat kontomut ikisarnerat takuneqarsinnaavoq, taakkuali marluutillugit eqqarsaatigineqarnatik.
Torben M. Andersenilli tamatuma piffissap ingerlanerani allanngussangatippaa. Innuttaasummi aningaasaqarnerat pitsaasumik ineriartuinnartussaarpasippoq.
- Taava innuttaasut immaqa maanna amerlariallattoqarnissaa naatsorsuutigisinnaavaat. Taama oqartoqarsinnaavoq. Piffissap ingerlanerani aningaasarsiaqarnerulerneq qularutissaanngitsut ilagaat. Tassa imaappoq, aningaasaateqarnerulernerput.
