Naajarluusarsuaq utoqqaq suli manniliortarpoq

USA-mi timmissat nujuartat utoqqaanersaat naajarluussarsuaq 60-inik ukioqartoq, suli manniliortarpoq.
Allattoq Jaaku Lyberth
marsip 10-at 2011 07:28

Naajarluusarsuaq Wisdomimik atserneqarsimasoq, Hawaiimi qeqertami Sand Islandimi sapaatit akunneri arlaqartut matuma siorna tukertitisivoq,

Naajarluusarsuaq Wisdom USA-mi timmissani utoqqaanersaavoq, taamallu utoqqaatiginera uppersineqareerluni.

Naajarluusarsuaq Wisdom tallimat missaaannik ukioqartoq 1956-imi ilisimatuunit nalunaaqutserneqarpoq. Wisdom taamanili 4,8 millionit kilometerisut isortartutigisumik timmereerpoq, Isortartussutsip taassuma assigaa nunarsuarmit qaammamut uterlugulu arfinileriarluni timinneq.

- Timmiarsuit taamaattut taamak sivisutigisumik uumasuusinnaanerat pissanganarpoq, 60-it sinnnerlugit ukioqalernissartik tikillugu manniliorsinnaanerat aammalu tukertitsisinnaanerat tupinnarpoq, pinngortitat inuunerannik missuisartoq biolog John Klavitter naajarluusarsuarmik Wisdomimik malinnaasoq oqarpoq.

Wisdom februaarimi tukertitsimmat John Klavitterip malinnaavigaa.

Naajarluusarsuaq Wisdom ukiut 60-it ingerlaneranni 35-inik tukertitsisimanissaa biologip nalilerpaa.

Naajarluusarsuit timmiaanertik tamakkerlugu aappariittarput, allanut nuliarsarneq ajorput, manniliaraangamillu ataatsimik manniliortarlutik.