IA-p ataatsimeersuarnissaa: Múte B. Egede nunatsinni angusaqangaatsiarpoq

Inuit Ataqatigiit ukiunik 45-nngortorsiornerminni partii Aasianni pilersinneqarfimmini ileqquusumik ataatsimeersuassaaq.

Partii Aasianni 1976-imi novembarimi alloriaqqaarpoq.

- Killiffik eqqarsaatigalugu aammalu Inuit Ataqatigiit partiitut ukiut 45-t sinnerlugit ingerlasimanerat eqqarsaatigalugu,

- Aamma uannut peqqilluni maani Aasiannut tikissinnaalluni Inuit Ataqatigeerpassuit sinerissaminngaanniit peqatigalugit assut nuannersoq isumaqarpunga. Assut qilanaarpunga. Tulluusimaarnarpoq, partiimik pilersitseqataasoq partiimilu siullersaalluni siulittaasuusimasoq, Aqqaluk Lynge oqarpoq.

Aqqaluk Lynge Inuit Ataqatigiinnik pilersitseqataavoq, taassumalu partiip 1976-imi pilersinneqarfianut Aasiannut tikeqqinnini nuannaarutigaa. Assi © : KNR / Hanna Hviid

Immikkoortortaqarfiit IA-milu ilaasortat qinikkat peqatigiillutik ukiunut tulliuttunut pingasunut naalakkersuinikkut anguniagassanik aalajangersaallutillu partiip siulersuisuunerinut qinersissapput.

- Aasianni Kattuffitta pilersinneqarfiani ataatsimeersuarnissamut qilanaarpunga, parteerput inuiaqatigiinni angisuumik akisussaaffeqarpoq aammalu nunarput inuilu pillugit pitsaanerpaamik aaqqiissutissarsiornissaminut pisussaaffeqarpoq,

- Ataatsimeersuarnissamilu immikkoortortaqarfigut peqatigalugit ukiuni tulliuttuni siunnerfinnik aalajangersaanissamut neriuuteqarluarpunga, IA-p siulittaasua, naalakkersuisullu siulittaasuat Múte B. Egede partiip nittartagaani allappoq.

Unammillerteqanngitsoq

Múte B. Egede partiip siulittaasorisimasaata Sara Olsvigip tunuarnerata kingorna partiip 2018-imi decembarimi immikkut ittumik ataatsimeersuarnerani siulittaasussatut qinerneqarpoq.

Taannalu Inatsisartunut 2021-mi qinersinermili aamma naalakkersuisunut siulittaasuulerpoq.

Taanna partiimi siulittaasussatut ukioq manna sassarpoq. Tamannalu Aqqaluk Lyngep taperserpaa.

- Partiip killiffimmini aammalu naalakkersuisuni nunatsinni siuttuunermini tatiginassutsi takutissimavaa.

- Múte B. Egedellu ingerlatsinera ataatsimut isigalugu nalilissagukku, nunarsuarmi taama najummatsernartigisumik ingerlasoqarnerani massakkut toqqissinarnerusumik ingerlatsinissamik Mútep siunertaqarnera tapersersugassaasoq isumaqarpunga. Nunatsinni ajunngitsorsuarmik naammassisaqarsimavoq, taanna oqarpoq.

Unnugu ataatsimeersuarnissaq sioqqullugu pilersaaruteqartoqarpoq, tassanilu ukiunik 45-nngortorsiornermut atatillugu filmiliaq “Inuit Ataqatigiit - illit aamma” ilaasortanut ilaatigut takutinneqassalluni.

Nuna tamakkerlugu ataatsimeersuarneq aqagu aallartissaaq, tassanilu oqalugiartoqarlunilu isumasioqatigiittoqassaaq. Sapaatiuppallu siulittaasussamik siulersuisuunernullu qinersisoqassaaq.