Meeqqanut inuusuttunullu naalakkersuisoq: Meeqqat ulluinnarni peqataatinneqarnerulertariaqarput

Meeqqat Ulluata malunnartinneqarnerani meeqqat ulluinnarni toqqissisimanissaat, isumassorneqarnissaat, tusaaneqarnissaat ulluinnarnilu inuunermi ilaatinneqarnissaat pingaaruteqartoq meeqqanut inuusuttunullu naalakkersuisoqarfik saqqummiussivoq.

Meeqqanut inuusuttunullu naalakkersuisoq Mariane Paviasen Jensen maajimi aatsaat naalakkersuisunngortoq suliassarpassuaqarpoq.

- Uanga massakkut naalakkersuisutut nutaatut massakkut suliat pulateqqaarfigileruttoqqavakka tassanilu takujumaarparput qaqugu suullu aqqutigalugit meeqqanik annerusumik suli peqataatitsineq qanutut angussaneripput, Mariane Paviasen Jensen KNR-imut oqarpoq.

Meeqqat pisinnaatitaaffiisa siuarsarneqarnissaannik, nukittorsarneqarnissaannik kiisalu meeqqat atugarissaarnissaannik ukkatarinninnerulernissaq siunertaralugu, nunatsinni Meeqqat Ulluat NAKUUSA-mit ippassaq juunip ulluisa aallaqqaataani nalliussineqartarpoq.

Meeqqat ataatsimeersuarneranni piumasaqaatit suliarigai

NAKUUSA-p meeqqanik ataatsimeersuartitsinerani iliuuseqarsinnaassuseq aamma meeqqanik inuusuttunillu siuarsaaneq apriilip ulluisa aqqarnganniit aqqaneq aappaannut sammineqarpoq.

Ataatsimeersuarnerminni qulequttat tallimat; ullut tamaasa toqqissisimarusuppugut, ikioqqugutta ikiorneqartussaavugut, ataatsimuussaagut nuannersumik, toqqissisimassagutta iliuuseqartoqartussaavoq aamma imminut ikiorit saqqummiuppaat.

Ataatsimeersuaarnerup kingorna meeqqat naalakkersuisunut borgmesterinullu sammisaminnik piumasaqaatiminnillu maajip ulluisa 21-ni saqqummiussipput.

Meeqqanut inuusuttunullu Naalakkersuisoqarfimmiit meeqqat saqqummiussaat sulissutigineqartoq, Mariane Paviasen Jensenip oqaatigaa.

- Taanna suliaq ingerlavoq, ukua suliakkiussat massakkut meeqqaniit tunniunneqarnikut pimoorullugit suliaralugit ingerlatilereerpagut.

Meeqqat toqqissisimanissaat pingaaruteqartoq

Meeqqat inuusuttullu ukioqanngitsuniit 23-t ukiullit 20-ugaangata ataaseq 2024-mi angerlarsimaffiup avataanut inissinneqartoq, Deloitte meeqqanut inuusuttullu inissinneqartarnerini aningaasartuutinik misissueqqissaarnermut nalunaarusiaa taama imaqarpoq.

Meeqqat inuusuttullu angerlarsimaffiup avataanut inissinneqartartut taama amerlatiginerat Meeqqanut inuusuttunullu naalakkersuisup Mariane Paviasen Jensenip tupaallaatigaa.

- Massakkutut ingerlaannarneq akuerineqarsinnaanngilaq siusissukkut iliuuseqartarnissaq taanna anguniarlugu suliniutit ingerlannissaat siunnerfeqarpunga.

Meeqqat atugarissaarnerulernissaat ulluinnarnilu ilaatinnerulernissaat anguniarlugu inuiaqatigiittut ikioqatigiinneq pisariaqartoq Mariane Paviasen Jensen isumaqarpoq.

- Angajoqqaat, inersimasut, ilaqutaasut qanigisaasullu tassa taakkuusariaqarput aamma kivitseqataasut. Ulluinnarni meeqqat tusarnaarlugit timaasa qanoq iliuusaat maluginiarlugillu pisinnaapput, Naalakkersuisoq oqarpoq.