Meeqqat sinittarnerat siunissamik qulakkeerinissamut pingaaruteqarpoq - sinnakippallaartarpulli

Meeqqat atuartut qassinik ukioqarnerat apeqqutaalluni akunnernit arfineq-pingasunit aqqanilinnut sivisussuseqartartumik sinittassapput.
Peqqinnissamut aqutsisoqarfiup tamanna innersuussutigaa, nunatsinnili atuartorpassuarnut piviusoq allaasoq, ilinniartitaanermut siunnersorti, Helene Broberg Berthelsen oqarpoq.
- Meerartagut inuusuttortattalu ilarujussuit qasuersimanatit kingusinaarlutillu atuariartorajupput, taanna Qeqqata kommuniani atuartut sinittarnerannik misissuinermi nutaami inerniliivoq.
Meeqqallu sinnakittarnerat ilikkarniarnissaannut ukkassiniarnerannullu akornutaasoq, Qeqqata Kommunia tusagassiuutinut nalunaarummi allappoq.
Piginnaanerilli taakku akornuserneqarnerat suli annerusumik kingunerluuteqartoq, ilinniartitaanermut siunnersorti isumaqarpoq.
- Maanna iliuuseqarfiginngikkutsigu siunissami sinittualernissaa takuneqarsinnaavoq, tamanna nunatsinni akissaqartinngilarput, taanna oqarpoq.
Qeqqata Kommuniani borgmesterip, Malik Berthelsenip tamanna aamma isumaqarpoq.
- Inuiaqatigiittut ullumikkut ileqqorput allanngortinneqanngippat, qanoq amerlatigisut ilinniaqqiffinnut ingerlaqqittarnissaat ernumassutigivara.
- Atuartut affaasa missaat ilinniagaqalertarnerat, taakkunanngalu 20%-ii inuussutissarsiutigalugu ilinniarfinnut ingerlaqqittarnerat, ukiut 10-t qaangiuppata suli ullumikkutulli inissisimassaaq, borgmesteri tusagassiuutinut nalunaarummi oqarpoq.
Suleqatigiinneq aqqutissaasoq
Taamaammat siunnersortip meeqqanut iluaqutissaq pissutigalugu - atuarfiit angajoqqaallu pitsaanerusumik suleqatigiilernissaat pisariaqartutut isigaa.
- Angajoqqaat suleqatiginissaat assigiimmillu oqalunnissarput pingaaruteqarluinnarpoq. Meeqqallu sooq taama eqqumatigisarnerisa paasinissaat pingaaruteqarpoq.
- Meeqqat innartikkaangatsigit sininnissaat naatsorsuutigisarparput, kisianni digitalikkut pisut amerlasuunut aporfiupput, taanna oqarpoq.
Taassumali suliassap ajornakusoornera nassuerutigaa, angajoqqaammi amerlasuut ilaatigut atuarfik pitsaasumik misigisaqarfigisimanngilaat.
Taamaakkaluartorli angajoqqaat, atuarfiit kommunillu suleqatigiiffeqarnerat ilaatigut aaqqiissutaassasoraa.
- Kommunit atuarfiit ataasiakkaat suleqatigiiffigisariaqarpagut angajoqqaallu angerlarnissamut ilinniakkerinissamut sininnissamullu aalajangersimasumik piffissaliinissamut ilaatinneqartariaqarput, taanna oqarpoq.
Qeqqata Kommunialu pitsaasunik suliniutinik aallartittoqarsimasoq, taanna oqarpoq, taassumalu kommunit aalajangiusimanissaat pingaaruteqartoq erseqqissaatigaa.
Pinngitsaaliisoqassanngitsoq
- Meeqqat inuiaqatigiinni annerusumi ilaalernissaannut sungiusassavagut. Taamaammat angerlarsimaffinni aalajangersimasunik malittarisassiortariaqarpugut. Angajoqqaat peqatigalugit siunertaqarluartumik eqqarsassaagut, taamaalillutik pinngitsaalineqartutut misigisimassanatik, Helene Broberg Berthelsen oqarpoq.
Malik Berthelsenillu tusagassiuutinut nalunaarut naggaserlugu angajoqqaanut kaammattuuteqarluni oqarpoq: ‘Inuunermimi anguniagaqarneq inuunermi akorngutaanani, ineriartuutaasarpoq’.