Politiit ullormut nalunaarutaat: Meeqqat marluk SAR-imik suliaqartoqarneratigut ajunngitsut nassaarineqartut

Issittumi Sakkutooqarfiup aamma Kalaallit Nunaanni Politiit nukappiaqqat marluk tammaaneqarnerat pissutigalugu SAR-imik suliaqarneq marlunngornermi unnukkut aqqanernut aallartippaat.

Nukappiaqqat marluk ulloq unnuarlu paaqqutarinniffimmeersut Ilulissat avannaanni Kangerluarsummi illuaqqamiitsillutik qimaapput.

- Meeqqat marluk illuaqqamit nalunaaqutaq 15.30-p missaani qimaapput, piffissarlu ingerlalertormat sulisut ernumagaluttuinnarput, Kalaallit Nunaanni Politiini sillimasut pisortaat, Jeppe Andsager oqarpoq.

Kalaallit Nunaanni Politiit nalunaaqutaq unnukkut qulit missaanni nalunaarfigineqarput, taakkulu qulimiguulik atorlugu nukappiaqqat aqqaneq-marlunnik aqqaneq-pingasunillu ukioqartut ujaariniarlugit SAR-imik aallartitsipput.

- Nukappiaqqat Kangerluarsuup illuatungaani illuaqqami ajoratik sinittut nassaarineqarput, Jeppe Ansager oqarpoq.

Tillinniarneq aserorterinerusinnaasorlu

Maniitsumi unnuaq aamma tillinniartoqarpoq. Tassani immiaaqqat karsit pingasut tupanillu nioqqutit arlallit tillinneqarput.

- Nakkutilliissummit inuit sisamat iserlutik tillinniarsimasut takusinnaavarput, Jeppe Andsager oqarpoq.

Kalaallit Nunaanni Politiit suliaq suli misissueqqissaarfigaat, innutaasullu takusaqarsimasut tusagaqarsimasulluunniit politiinut attaveqarnissaannik kaammattuuteqarfigaat.

Tamatuma saniatigut Nuummi Deres Tankimi aserorterinermut tunngasoq tallimanngornermi ullaakkut nalunaarutigineqarpoq, tassa matu aserorlugu isertoqarluni iluani tukatsitsisoqarsimavoq.

Suliaq suli misissueqqissaarfigineqarpoq.