Meeqqat innersuussutaat Múte B. Egedemit tiguneqartut

Meeqqat ataatsimeersuartinneqarneranni meeqqat inuusuttullu onlinekkut illersorneqarnerunissaat qulequtarineqarpoq.

Meeqqat inuusuttut onlinekkut qanoq illersorneqarnerusinnaanerlutik qulequtaralugu oktobarimi ataatsimeersuarput nunatsinnilu politikerinut maanna innersuussuteqarput.

Innersuussuitigineqartullu Múte B. Egedemut, kommunini borgmesterinut nunatsinnilu kommuninit aallartitanut meeqqanit novembarip 29-ani tunniunneqartut.

Unicef Nakuusalu meeqqat ataatsimersuarnerannik aaqqissuisut tusagassiutinut nalunaarummi allapput.

Inuusuttut assuarnartunik aqqusaagaqartartut

Meeqqat inuusuttullu onlinekkut qanoq illersorneqarnerunissaannik innersuussutit politikerinut tunniunneqarput. Lenalu 15-inik ukiulik aamma oqalugiarpoq, ilaatigut inuusuttut Múte B. Egedelu aamma atsioqatigiillutik.

Meeqqat inuusuttullu ataatsimeersuarnermi peqataasut sinnerlugit 15-inik ukiulik Lena politikerinut oqalugiarpoq. Innersuussutillu politikerinit pimoorunneqarnissaat neriuutigaa. Assi © : David Ottesen

- Ataatsimeersuarnerup nalaani eqqartueqatigiinnitsinni maluginiarsimavarput meeqqat inuusuttullu assigiinngitsunik onlinekkut nalaataqartartut, amerlasuullu nuanninngitsunik aamma misigisaqarfigisarsimavaat soorlu assersuutigalugu: Grooming aammalu kinguaassiutitigut kanngutsaatsuliorfigineqarneq, taanna oqarpoq.

Meeqqat inuusuttullu innersuussutaat Múte B. Egedemit aamma atsiorneqarpoq. Assi © : David Ottesen

Sammisarlu pingaarutilerujussuaq toqqarsimagaat Tina Dam Unicef Kalaallit Nunaanni allaffeqarfimmi suliniutinut pisortap erseqqissarpaa.

- Internetsikkut innarligaaneq eqqarsartaatsikkut peqqissusaannut nalerisimaarnerannullu navianaatilimmik kingunerluutitaqarsinnaavoq. [...] Meeqqat inuusuttullu onlinemik atuinerata illersorneqarnissaa inersimasut akisussaaffigaat, Tina Dam tusagassiutinut nalunaarummi oqarpoq.

Innersuussutillu tunniunneqarnerani politikerit tunniussinermi peqataasut siunnersuutit pimoorullugit iliuuseqarfigiumaaraat neriuutigalugu siunissamilu meeqqat inuusuttullu onlinemik atuinerat nuannersuulluni isumannaatsunissaa 15-inik ukiullip Lenap oqalugiarnini naggaserlugu taama oqalugiarpoq.