Meeqqat illersuisuata eqqarsartaaseq allangortikkusuppaa
- Siunissarput - toqqaannartumik oqaatigalugu, nammineerluta tigummivarput - kisianni sakkortuumik sulinermik immikkut pisinnaatitaaffinnik ikinnerusunik aaqqiissutinillu allaanerusunik akilerusupparput? Meeqqat Illersuisuat Aaja Chemnitz Larsen oqallissaarusiamini ICC-p Inuuvimmi ataatsimeersuarnerani peqataareerluni allakkamini taama oqallissaarivoq.
Meeqqat Illersuisuata minnerunngitsumik pingaartippaa kalaallit namminiilivinnissamik takorluugaqarnerannut atatillugu qaffasinnerusumik ilinniagaqarnissaq pisariaqarmat, taamaattumillu isumaqarluni ilinniagaqarnerup allaanerusumik eqqarsaatigineqartalernissaa pisariaqalersoq.
- Immaqa ilinniartitaaneq pisinnaatitaaffittut isigiunnaarlugu, pisussaaffittut isigilertariaqarparput. Namminiilivinnissaq ilumoorluta kissaatigigutsigu, aamma pineqarput piffissamik, nukimmik aamma pimoorussinermik qanoq atuerusunnersugut, Aaja Chemnitz Larsen oqarpoq.
Taanna isumaqarpoq piviusumik attanneqarsinnaasumik ineriartortitsineq - inuttut aningaasaqarnikkullu - kinguaariinnit inuusunnerusunit pissusissamisoortumik aallaaveqartoq.
- Pinaveersaartitsineq aaqqiissutissallu siunissamut ungasinnerusumut tunngasut suli annerujussuarmik eqqarsaatigisariaqarpavut. Meeqqat tamarmik ataqqinassusilimmik toqqissisimasumillu meeraanissaat qulakkeerniarlugu allannguinerujussuit pisariaqarput, taamaattorli allannguineit angisuut piffissaq sivisooq atorlugu anguneqartarput, aallartinnissamullu maanna piffissanngorpoq, Meeqqat illersuisuat oqarpoq.
