Maniitsup eqqaani itersapiluunersuaq nunarsuami itinersaallunilu pisoqaanersaassasimasoq

Aliguaraaraqarnera itersapiluunersuaqarneranik ersertitsisuusoq, ilisimatusarluni misissuinermi kingullermi inerniliussaavoq.
Ilisimatusartoqatigiit Maniitsup eqqaani misissugartik itersapiluunersuusoq qanganisarsuusorlu isumaqarput. Assi © : GEUS
Allattoq Ivik Kristiansen
decembarip 03-at 2023 10:51

Nunarsuarmi tamarmi uissuummissutaaqqaarpoq.

Ilisimatusarlunili misissuinermi allami kingorna ilumuunnginneragaavoq. Massakkulli allatut inerniliisoqaqqippoq. Maniitsummi eqqaata ullorissap anaanit qangarsuaq tuffigineqarsimalluni itersapiluuneqarneranik uppernarsaatissaqartoq, ilisimatusartut maanna isumaqarput.

Maniitsummi eqqaa itersapiluunermik milliardinik pingasunik pisoqaassuseqartumik tunngaveqartoq uppernarsaatissarsisimagitsik, ilisimatusartoqatigiit oqarput.

- Ilumut taamassimappat, nunarsuarmi itersarsuarni anginerpaallunilu pisoqaanerpaasimassaaq, Danmarkimi nunatsinnilu nunap qanoq issusianik misissuisarfimmeersut, tassa De Nationale Geologiske Undersøgelser for Danmark og Grønlandimeersut (GEUS) tusagassiutinut nalunaarumminni allapput.

Maniitsup eqqaani itersapiluunersuaq ukiut millirdilikkuutaat matuma siorna pinngorami nigaa 500 kilometerinik akunneqarsimagaluarluni maanna 100 kilometeritut akunneqarpoq.

Ilisimatusartoq GEUS-imeersoq, Adam Gaarde, ilisimatusartoqatigiit misissuineranni nutaami siuttuuvoq.

Rekordbogimut ilanngunneqaraluarluni suli qulartoqartoq

Adam Gaardelu Maniitsup eqqaani ilisimatusartoqatigiinnut aatsaat siuttuulinngilaq. Taassumami ilisimatusartoqatigiit Maniitsup eqqaata itersakullassuuneranik 2012-imi nalunaarutillit aamma siuttuuffigai. Ilisimatusartoqatigiit taakkua taamanikkut nalunaarutaat nunarsuarmi tamarmi uissuummissutaavoq. Itersapiluunersuaq taanna nunarsuarmi itersarsuarni ilisimaneqartuni pisoqaanersaattut taaneqarluni Guinness Rekordbogimut 2015-imi allaat ilanngunneqarpoq.

Ilisimatusartulli silarsuaanni qulartoqartuarsinnarpoq. Maniitsullu eqqaa avataarsuaniit tuffigineqarsimasutut isikkoqannginnerarlugu,  2021-mi misissuinermi inerniliussaavoq. Tamanna nunap pissusiata allanngorarneranit taama isikkoqalersimasuusoq oqaatigineqarpoq.

Adam Gaardelli tamanna nikalluutiginngilaa. Ilisimatusaqatinilumi EU-p aningaasaligaanik nutaalianik atortorissaarutilisarlutik Maniitsup eqqaanukaqqikkamik aliguaraaqqat nassaatik misissorpaat.

Aliguaraaqqat sorujussuaqarneranik uppernarsaasut

Maniitsullu eqqaa ilumut ullorissap anarujussuanik tuffigineqarluni itersarsuanngorsimasoq, taakku misissuinerminni kingullermi paasisaminnik saqqummiussinerminni inerniliuppaat.

- Ilisimatusartoqatigiit mikisuaraaqqqanik misissuigamik sorujussuaqarneranik uppernarsaasunik nassaarput, GEUS tusagassiutinut nalunaarumminni aamma allappoq.

Ilisimatusartut aliguaraaqqanik, nukipiluunersuit sunniinnerisigut pinngortartunik, misissuisimasut, GEUS allappoq. Tamakkua nunap sajuvissorneranit suunersulluunniit manngersut avatarsuaneersut tukkaangata pinngortarput.

Ilisimatusartoqatigiit taakku aliaguaraaqqanik ullorissap anarujussuanik tunneraneersuunerannik uppernasagaasunik taavalu Norgemi Frankrigimilu nuna sajunnikumeersunik ullorissalli anarujussuanik nakkarfigineqarnikuunngitsuneersunik misissuipput. Tamakkualu misissornerisa Maniitsup eqqaa ullorissap anarujussuanik nakkarfigineqarnikkut taama iluseqalersimasoq inerniliuppaat.