Maniitsumi uuliakoortoqartoq

Uulia Maniitsup umiarsualivianut sapaatit akunnerata siuliani tallimanngornermi kuulerpoq. 

Uulia nunamiit immamut kuussimasoq literi qassiussanersut qularnaatsumik oqaatigineqanngilaq. 

Iluliarlu umiarsualivimmut pulammassimmat, uuliap kooreersup milluarnissaa ajornakusoorpoq.

Maniitsumi ajutoornermi aqutsisoq, Jørgen Lynge, taama paasissutissiivoq.

- Nukissiorfiit sulisuaninngaanniit tallimanngormat sianerfigitippugut.

Maniitsumi qatserisartuni ulluinnarni aqutsisoq, Jørgen Lynge taama oqarpoq.

Tallimanngormat nalunaaqutaq tallimat missaanni uuliakuiaalerlutik taanna ilanngullugu paasissutissiivoq.

Uulia qanoq angitigisoq kuussimanersoq aperineqarami, taanna ima akivoq.

- Taanna Nukissiorfiit akisinnaassavaat. Kisianni paasisakka malillugit 10.000 literipajaarooq kuussimavoq. Annertussuseqqissaaq paasinikuunngilara, kisianni nalunaarusiami taama allaqqalluni.

KNR Nukissiorfinnut attaveqarpoq, uumali ilanngutassiap naammassinerani suli akinngillat.

Iluliaq akornutaasoq

Uuliakoornermik tallimanngormat kalerrinneqaramik milluaatinik siaartiterilerput. 

Uuliaakoorummilli immiivitsik aamma ajutoorutigisimavaat: 

- Millugussissutigut ulikkaartoorsimagamik ussiilersimasut aqaguaguani paasivarput. Taava suliaq nangillutigu puttasartunik immami unnukkut ikkussilluta. Tassanilu anianerata killilersimaartilerumaarnissaa neriuutigalutigu.

Uulia Nukissiorfiup illuutaaniit nunamiittumiit immamut kuuppoq. Uuliap immamut kuunnginnissaa maannakkut sulissutiginerugitsik, Jørgen Lynge paasissutissiivoq.

Uuliammi immamut kooreersup piiarnissaanut maannakkut ajornakusoorpoq. Iluliarmi Maniitsup umiarsualivianut uuliakoorfimmiittumut pulammaassimavoq. 

Iluliarsuarlu assakariassagaluarpat uuliap immamiittup piiarnissaa maanna ulorianarsinnaasutut nalilerneqarpoq.

- Tassaarsinnaanera sissami suliaqarsinnaanitsinnut killiliingaatsiaqqavoq. Sissami suliaqassagutta tassaarpallu nusutsissinnaanerput aarlerinarnerpaajugami suliaq uninngatikkallarparput, Jørgen Lynge oqarpoq.

Iluliarsuaq akornutaajunnaarpat uulia imaaniittoq piialissagitsik taanna paasissutissiivoq.

Suliarli qaqugu naammassissanersoq naatsorsorsinnaanagu oqarpoq.