Maniitsumi atuarfissamik soqutiginnittunut ammatitsineq: - Innuttaasut toqqissisimasutut misigissapput

Maniitsumi Atuarfik Kilaaseeraq eqqiaasartunit oqoqartoq paasineqarmat ukiut pingasut qaangiupput. Arfininngornermi atuarfittaami soqutiginnittunut ammatitsisoqarlunilu kaagillertoqarpoq.

Allattoq Birgitte Kjeldsen, Lis Lindenhann Jokumsen

maajip 19-at 2025 13:29

Nutserisoq Tabetha Kreutzmann

– Illu atulerpat oqoqarnissaa isumakuluutigineqassanngilaq, suummi tamarmik iluarsartuunneqarsimassapput.

Sapaatip-akunnerata naanerani atuarfissap nutaap soqutiginnittunut ammatinneqannginnera sioqqullugu, Maniitsumi Atuarfik Kilaaseeqqami pisortaagallartoq Brian Jespersen taama oqarpoq.

Maniitsumi innuttaasut soqutiginnittut tamarmik arfininngornermi ualikkut atuarfiup nutaap, pilersaarutit malillugit 2027-mi naammassisussap, takuniarnissaanut qaaqquneqarput.

– Isumaqarpugut iluarsartuussinerup sumut killinneranik takutitsineq pingaaruteqartoq, taamaalilluta atuarfissaq pillugu innuttaasut toqqissisimalersinnaaqqullugit, Brian Jespersen oqarpoq.

2022-p aallartinnerani Atuarfik Kilaaseeraq oqummit eqqugaammat, kommunalbestyrelsilu nutaamik atuarfiliornissamut itigartitsimmat, iluarsartuunneqartariaqarnera aalajangiunneqarpoq.

SULIAQ NAATSUMIK:

2022-mi januaarimi suliffeqarfik eqqiaasartoq atuarfiup eqaarsaartarfiani, ilinniartitsisut inaanni ininilu allani oqummik nassaarput. Atuartut ilinniartitsisullu tamarik nuutsiterneqarput atuartitsisoqalerlunilu illoqarfiup katersortarfiani, nipilersornermik ilinniarfiani amma illoqarfimmii inini allani.
Septembarimi 2022-mi angajoqqaat, ilinnniartitsisut aamma atuartut arlallit piumasaqarput september 2022 Qeqqata Kommunia nutaamik atuarfiuliortitsissasoq aningaasaateqarfinnit aningaasalerneqartumik.
Decembarimi 2022-mi nutaamik atuarfiliornissamut kommunalbestyrelsi naagaarluni aalajangiivoq. Taarsiullugu kommunip atuarfik nutarterluinnartinniarppaa koruunit 71 milliuunit nalinginut. Nutarterineq 2026-mi naammassissasoq ilimagineqarpoq.
2023-mi aasaanerani kommunip suliffeqarfik atuarfiup nutarternissaanut eqqiarnissanulu imippaa. Saniatigut kommunip silaannarissarfiit inini atuartitsiviusuni ikkussortippai. Kommunip nalilerpaa atuarfimmi pissutsit atuartitsinerup nanginneqarnissaanut ajorunnaartut.
Aggustimi 2023-mi ukioq atuarfiusoq nutaaq aallartippoq, kommunillu nalilerpaa atuarfiup inai amerlanerit isumannanngitsut. Taamaattumik atuartut amerlanerpaat atuarfimmut ukiumi atuarfiusumi 2023-2024-mi uterput.
Aggustimi 2023-mi undervises 1. aamma 2. klassit suli atuarfiup avataani atuartinneqarput, init ilaat suli isumannaatsutut nalilerneqanngimmata. Atuarfiup paaqqinniffia aamma soraareerneri ornittagaq aamma atuarfiup avataaniipput.
Ukiumi atuarfiusumi niutaami ilinniartitsisut atuartullu atuarfimmi suli iluaagisaqartarput.
Septembarimi 2023-mi atuarfiu pisortaa Mina Maria Andersen ilinniartitsisunut nalunaarpoq atuarfiup illutaa oqummik nassaartoqaqqittoq. Massakkut atuarfiup igaani silammut sammisuni.
Oktobarimi 2023-mi atuarfiup pisortaqarfia aamma Qeqqata Kommunia ininik atuartitsiffiugallarsinnaasunik nutarterinerup naammassinissaata tungaanut atorneqartussanik

Allisiguk

Silaannarissarfiit qaammaqqusersuinerillu pitsaasut kiisalu nipikillisaatit atortut atorlugit illuni nutaani ininik pitsaanerusumik silaannalinnik atuartitsiviusunik qulakkeerinnittoqarniarpoq.

Brian Jespersen naapertorlugu tamatuma saniatigut ukiut marluk qaangiuppata atuartunut 340-nut ilinniartitsisunullu 20-nut atuarfimmi atuartitsisoqaqqissinnaalernerani avatangiisit nutaarluinnaassapput.

– Avatangiisit nutaajussapput, taamaalillunilu Maniitsumi sulinissaq pilerinarnerulissaaq, atuarfiup pisortaa oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.