Politiit ullormut nalunaarutaat: Maniitsumi angut inuusuttoq ujajaasoq tigusarineqartoq

Angut inuusuttup Maniitsumi Brugseneeqqami ujajaanini pissutigalugu sisamanngornermi ullaap tungaani tigusarineqarpoq, Kalaallit Nunaata Politiivini sillimasut pisortaat Aputsiaq Hansen tallimanngornermi ullaakkut oqaluttuarpoq.

- Pisoq nalunaaqutaq 10.40 nalunaarutigineqarpoq, pinerluttorlu kinguninngua tigusarineqarpoq, sillimasut pisortaat oqaluttuarpoq.

Nakuuserneq sioorasaarinerlu

Inuusuttup tigusarineqannginnermini sulisunut inuunermik sioorasaaralunilu nakuusersimasoq, sillimasut pisortaat paasissutissiivoq.

- Inuit aarlerinnginniassammata, pinerluttoq tigusarineqartoq sulisullu tamarmik ajoqusersimanngitsut, sillimasut pisortaata erseqqissaatigaa.

Pinerluttoq 18-it inorlugit ukioqartoq, pillaatissinneqarsinnaanermut ukiut killissarititaasut, tassa 15-it sinneqqammagit, tigummigallarneqarnissaa anguniarlugu ullumi ullorornerani sassartinneqassaaq, sillimasut pisortaat oqaluttuarpoq.  

Inuusuttoq 18-it inorlugit ukioqarnera pissutigalugu, suliami isumaginnittoqarfik ilanngunneqarpoq, sillimasut pisortaat naggasiilluni oqarpoq.