Mølgaard Christensen VM-imi nr. 16-inngorpoq
BMX-ertartoq Tommy Mølgaard Christensen freestylemik finalertoqarnerani uppittooraluarluni VM-imut peqataanermini angusani naammagisimaarluarpai.
Allattoq Camilla Dam / Simon Uldum
BMX-ertartut nunarsuarmi pissartanngorniunnerini unammeriaatsini assigiinngitsuni finalernerit Tysklandimi illoqarfimmi Kölnimi sapaatit akunnerata naanerani kiassuup ataani ingerlanneqarput.
Inuussutissarsiutiginagu BMX-ertartut superbowlimi finalermata Tommy Mølgaard Christensen peqataavoq, ullorlu taanna 34-nik kiappoq.
Ajoraluartumilli ingerlaarneermini uppittoorami sikkilimi tukkaaviata aappaa napisoorutigaa. Taamaalillunilu unamminermini peqataasinnaajunnaarpoq normu 16-inngorlunilu kingullersanngorpoq.
- Angusani naammagisimaarpai. Sisimiunimi sungiusarfigisartagaanut naleqqiullugu maani unammiffiusut anginerungaatsiarput.
- Aamma Kalaallit Nunaata siullerpaamik peqataatitaqarnerani peqataanini tulluusimaarutigaa, anaanaa Malene Christensen Kölnimit e-mailikkut taama nalunaarpoq.
Inuussutissarsiutiginagu BMX-ertartut superbowlimi unamminerat 61-init peqataaffigineqarpoq.
Unammiffik portusuupilussuaq
Sisimiuni sungiusarfigisartagaata portunerpaaffia 180 centimeteriuvoq, Kölnimilu unammiffiusup appasinnerpaaffigisaa meterinik marlunnik portussuseqarluni.
Tommy Mølgaard Christensen ilinniariarluni Randersimut nuuttussaavoq. Sungiusaasua Thomas 'Tarzan' Hansen tassani aamma najugaqarpoq, taamaammat BMX-ertarnini unitsikkallarnavianngilaa.
Inuk Siegstad VM-imi finalimut anngutinngitsoorpoq
Kalaallit VM-imut peqataasut aappaata, Inuk Siegstadip, inuussutissarsiutigalugu unammisartut unammeqatigai.
Sisimiormiu ingerlalluaraluarpoq, angusanilumi aamma naammagisimaarpai, angunniuttoqarneranili 45-t peqataaffigisaanni normu 36-nngorpoq, taakkunanngalu siulliit 16-it ingerlaqqipput.
Freestylerluni unammeriaatsini assigiinngitsuni pingasuni VM-imi unamminerit Tysklandimi illoqarfimmi Kölnimi sapaatit akunnerata naanerani ingerlanneqarput, BMX-ertartut 300-t peqataapput isiginnaariallu 10.000-it missaanniillutik.