Løkkep danskit qaammatip tulliuttup qaangiutinnginnerani nutaanik naalakkersuisunngortitsissangatinngikkai

Danmarkimi naalakkersuisut nutaat ivertinnissaannut sapaatip-akunnerini arlalinni suli isumaqatigiinniuttoqarniarpasilerpoq.

Moderaterne siulittaasuat, Lars Løkke Rasmussen, taama naliliivoq.

- Ilumoorlunga eqqoriaassaguma, qaammatip tulliata qaangiutinnginnerani tamanna pinavianngitsoq ilimagaara, taanna YouTubekkoortartumut Jonas Laursenimut, Løkkemik videoliaaqqamik saqqummiisumut oqarpoq.

Løkkep immikkoortuni marlunni isumaqatiginniartoqarnissaa nassuiaatigaa.  Isumaqatiginninniarnerni immikkoortoq siullermi maannakkut ingerlanneqartumi, partiit sorliit naalakkersuisunngortitsinissamut peqataassanersut aalajangerneqassaaq.

- Isumaqarpunga tamanna sapaatip-akunnerata ataatsip missaa qaangiutsinnagu inaarutaasumik aalajangerneqarnavianngitsoq, Løkke tuluttut apersorneqarnermini oqarpoq.

Partiit naalakkersuisooqatigiilernissamut isumaqatigiissuteqarsimasut politikkikkut tunngavissaq pillugu tamatuma kingorna sapaatip-akunneri arlallit isumaqatigiinniarnissaat naatsorsuutigaa.

Løkkep kunngikkormiut misissuisuat, Mette Frederiksen (S), partiinik talerperlernik oqaloqateqarnissamut kajumissaarsimallugu erseqqissarpaa, nammineq Moderaternellu naalakkersuisooqatigiit qitiusumik inissisimasut kissaatigigamikkit.

Partiit saamerlerneersut isumaqatiginninniaqatiginerugai

Mette Frederiksen Folketingimut marsip 24-anni qinersisoqarneraniilli partiit saamerlerneersut Moderaternenillu, qinersinermi aalajangiisuusinnaasut, isumaqatiginninniarfigineruniarsarai.

Lars Løkke Rasmussenip sapaatip-akunnerani kingullermi tallimanngornermi killiliinissaata tungaanut Mette Frederiksenillu Venstre aamma De Konservative isumaqatigiinniarnernut qaaqqunianngippagit, Moderaterne isumaqatigiinniarnernut peqataaqqinnaviannginnerannik nalunaaruteqarnissaata tungaanut taamaappoq.

Partiit taakku marluk Mette Frederiksen isumaqatiginninniaqatiginissaanut piareersarlutik taamaallaat ataatsimeeqatigisimavaat.

Venstrep siuttua, siulittaasup Troels Lund Poulsenip napparsimanera pissutigalugu peqataasinnaanngitsoq minillugu, ministeriuneqarfimmi ataasinngornermi isumaqatiginninniaqataapput. Siulittaasup tulliata Stephanie Losep (V) tamatuma kingorna ataatsimeeqateqarluarsimanerarlutik nalunaarutigaa, ataatsimeeqqinnissarlu naatsorsuutiginerarlugu.

- Aaqqissuusseqqinnerup ingerlateqqinnissaanut, suliffeqarfiit unammillersinnaanerannut aningaasaliinissamut akisussaassuseqartumillu aningaasaqarnermik politikkeqarusunnermut pingaarutillit tamaasa angusinnaassagutsigit suli ataatsimiittoqartariaqartoq isumaqarpunga. Ataguli takulaariartigu, Lose oqarpoq.

Kunngikkormiut misissuisuata talerperlerneersuunissaa kissaatigineqartoq

 Konservativet marlunngornermi tulliupput. Siulittaasuata Mona Juulip Mette Frederiksen ataatsimiinnerup kingorna nalunaarfigaa, kunngikkormiuniit misissuisup talerperlerneersuunissaa kissaatigalugu.

- Kunngikkormiuniit misissuisup talerperlerneersuunissaa kissaatigalugu nalunaarutigaarput. Partiit talerperlerneersunit immaqa qiterlermeersut peqatigalugit naalakkersuisunngortitsisoqarsinnaanersoq misissorneqaqqullugu. Taamaattumik ataatsimiinneq sivikinnerussaaq, taanna oqarpoq.

Aamma partiip naalakkersuisunngortitsinissamut isumaqatigiinniarnernut qaaqquneqaqqikkumaarnera naatsorsuutiginagu oqarpoq.

Naalakkersuisunngortussat SVM-imi naalakkersuisut aningaasaqarnermut pilersaarutaannik ingerlatitseqqinnissaat nutarterinissaallu Moderaternenut "pingaaruteqarluinnartuusoq“ Løkke oqarpoq. Tamanna SF-imit Enhedslisteniminngaanniillu isorineqarpoq.

Liberal Alliance, Danmarksdemokraterne, Dansk Folkeparti aamma Borgernes Parti isumaqatiginninniarnernut qaaqquneqarsimanngillat.

/ritzau/