Kunngi Frederik nunatsinnut februaarimi tikeraassasoq

Kunngip Frederiup nunarput februaarip 18-iannit 20-annut tikeraassavaa.

Taassuma tamanna Litauenimi tikeraarnermini tusagassiortunik sisamanngornermi katersortitsinermi oqaatigaa.

- Kalaallit misiginneqatigingaatsiarpagut, Kalaallit Nunaannilu sapaatip akunnerini kingullerni pisut attortissutigingaatsiarpagut.

- Kalaallit ernumangaatsiartut tusagassiuutitigut maluginiarparput. Tamanna marluulluta sunnertissutigaarput. Kalaallit Nunaat uummateqarfigilluinnarparput, Kunngi oqarpoq.

Maannakkumut oqaaseqarsimanngitsoq

Kunngip Frederiup USA-p præsidentiata Donald Trumpip Kalaallit Nunaannik aqutsilerusunnini qaammammi matumani siusinnerusukkut oqaatigeqqereeraalu Kalaallit Nunaanni pissutsit aatsaat siullermeertumik oqaaseqarfigai.

Natomi ataatsimoorneq aamma USA-p Danmarkillu akornanni atassuteqarnermi pissutsit kingunerisaanik misiligarneqarput præsidentilli akitsuutinik siorasaaruteqarnerminik tunuartitsineratigut ilaatigut eqqissisimanerusoqalerpoq.

Kunngip Frederiup Kalaallit Nunaata atugarissaarnera pingaartilluinnarlugu sisamanngornermi erseqqissaatigaa.

- Pingaartumik sapaatit akunnerini makkunani. Kalaallit soorunami nukissaqalersinneqassapput.

Malinnaasut

Kunngi Dronningilu Kalaallit Nunaannut atatillugu susoqarneranut - tassunga nunanit allanit tapersersuineq ilanngullugu malinnaaffigalugit oqaatigaa.

- Sammingaatsiarpagut. Aamma Kalaallit Nunaannut, kalaallinut aamma Kunngeqarfik Danmarkimut qanimut iligisatsinnit qanoq tapersersuisoqarnera aamma maluginiarparput. Tamanna eqqissiallaataalluinnarpoq, kunngi oqarpoq.

- Meeqqagullu tassunga tunngatillugu ilaatigut apeqquteqartartunut aamma oqaloqatigiissutigisarparput, taanna oqarpoq.

Kunngi nunatsinnut kingullermik siorna apriilimi tikeraarpoq. Taassuma tikeraarnera kingulleq Trumpip nunatsinnik aqutsilerusunnerminik oqaaseqartarnerata nalaani aamma pivoq.

/Ritzau/