Kulturileriffiit akerleriittoqareernerani: Eqqumiitsuliortullu immitsinnut atorfissaqartippugut

Kalaallit eqqumiitsuliortut arlallit Ilulissani Eqqumiitsulianut Katersugaasivillu akerleriinnerat nunatsinni eqqumiitsuliornerup silarsuaanut sunniuteqarnerlunnissaa isumakulunnartoq, Nuummi Eqqumiitsulianik Saqqummersitsiviup pisortaa Nivi Christensen isumaqarpoq.
Assi © : Cebastian Rosing / Nuuk Kunstmuseum
Allattoq Ann-Sophie Greve Møller
maajip 10-at 2024 07:57
Nutserisoq Hanne Petersen

Ilulissani Eqqumiitsulianut Katersugaasiviup kalaallit eqqumiitsuliortut arfineq-marluk apereqqaarnagit suliaannik saqqummersitsinerata kingunerisaannik illuatungeriit taakkua akerleriinnnerat uitsatigineqarpoq.

Illuatungeriillu taakkua akerleriinnefat nunatsinni eqqumiitsuliortut kulturileriffiusullu suleqatigiinnerannik akornusiisinnaasoq, Nuummi Eqqumiitsulianik Saqqummersitsiviup pisortaa isumaqarpoq.

- Isumakulunnarpoq. Eqqumiitsuliortut kulturileriffiillu akornanni tatigeqatigiikkunnaartoqarpat, tamanna annaasaqaataangaatsiassaaq, Nuummi Eqqumiitsulianik Saqqummersitsiviup pisortaa Nivi Christensen oqarpoq.

Suliaq sumut tunngava?

  • Eqqumiitsuliortut arfineq-marluk, naammagittaalliuummik KNR-imut anngussipput, naammaginngisaat tassaalluni Ilulissani Eqqumiitsulianut Katersugaasivimmi ulluni makkunani saqqummersitsinermut takuniarneqarsinnaasumut Backbone-mik taasamut atatillugu suliamik ilaanissaannik aperineqaqqaarsimannginnertik ilisimatinneqaqqaarsimannginnertillu. Saqqummersitsineq marsip ulluisa 28-anni ammarmat atitik ilaasut aatsaat paasivaat.
  • Eqqumiitsuliortut marluk naluaat suliatik sorliit saqqummersitsimermi ilaatinneqarnersut, tassami Ilulissani Eqqumiitsulianut Katersugaasivimmut suliaminnik tunisaqarsimanngisaannaramik.
  • Eqqumiitsuliortut sisamat oqarput Ilulissani Eqqumiitsulianut Katersugaaviup pisortaanut Andreas Hoffmannimut suliaminnik tunisaqarnikuullutik, tupaallaatigaluguli suliamik katersugaasivimmi maanna saqqummersitsinermut ilaatinneqarnerat.
  • Eqqumiitsuliortut ilaata oqaatigivaa, suliami ilaat Ilulissani Eqqumiitsulianut Katersugaasiviannut ukiualuit matuma siornagut tunisimallugu, kisianni saqqummersitsinermi immikkut qulequtaqartinneqartumut ilaatinnissaanik aperineqarsimanani.
  • Eqqumiitsuliortut Kattuffiat KIMIK eqqumiitsuliortut arfineq-marluk uparuaataat illersorlugu Ilulissani Eqqumiitsulianut Katersugaasivimmik takutiginnikkunnaarluni nalunaarpoq.
  • Saqqummersitsineq Backbone kalaallit arnat eqqumiitsuliortut taakkulu nipaasa tusartinnissaat eqqumiitsuliaasa assigiinngitsut  eqqumiitsuliortunit 26-nit suliarineqartut – ukiuni kingullerni 24-ni suliarineqarsimasut - saqqummersinnerisigut tusartinniarneqarpoq. Taamaammat eqqumiitsuliortut tusarniarneqaqqaarneqarsimannginnertik naammaginngilaat.
  • Eqqumiitsuliortut ilaasa sisamat suliamik saqqummersitsinermit peerneqarnissaannik piumasaqarput.
  • Ilulissani Eqqumiitsulianut Katersugaasivimmi pisortaq, Andres Hoffmann, KNR-imut oqarpoq, eqqumiitsuliortunut attaveqarnerminnik pitsaanerulernissaannik suliniuteqassallutik.
  • Katersugaasiviup eqqumiitsuliat saqqummersitassatut toqqarneqartut, saqqummersinneqaannarnissaat aalajangerneqareersoq, naak eqqumiitsuliortut peerneqarnissaat piumasarigaluaraat.
Allisiguk

Taamaammat Nuummi Eqqumiitsulianik Saqqummersitsivik nunatsinni katersugaasiviit eqqumiitsuliortullu akornanni suleqatigiinnermut nutaanik malittarisassaliuleruttorpoq.

Eqqumiitsuliortut attaveqatigilluarnissaat ataqqinissaallu nutaanik malittarisassaliornermi pingaarnertut qularnaagassanut ilaavoq, Nivi Christensen oqarpoq.

- Eqqumiitsuliornerup silarsuaani kukkunerit ilikkagaqarfiginissaat pingaarpoq. Kukkunerillu aatsaat nassueritiginerisigut taamaaliorsinnaavugut.

Saqqummersitsiveqanngitsoq katersugaasiviillu qassikattaannaasut

Nuummi Kulturip Illorsuata Katuap pisortaa, Ivaaq Kriegel, isumaqataavoq.

Nunatsinnimi eqqumiitsuliortut kulturileriffiusullu attaveqatigiinnerusariaqartut, taanna isumaqarpoq.

- Soorunalimi pitsanngugassaqartuaannarpoq sumiluunniit. Taakkua pitsanngugassanut akuupput, eqqumiitsuliortut qanimut attaveqatiginissai, Ilulissani Eqqumiitsulianut Katersugaasiviup iliuusianik oqallinnermut aamma malinnaasoq Ivaaq Kriegel oqarpoq.

Ilulissani Eqqumiitsulianut Katersugaasivik eqqumiitsuliortut suliaannik apereqqaarnani saqqummiisinnaatitaanera inatsisitigut aporfiunngitsoq, Danmarkimi assilialiortartut kattuffiat Billedkunstnernes Forbund ilisimatitsivoq.

Aamma nunani assigiinngitsuni katersugaasiviit ilaat eqqumiitsulianik saqqummersitsitsisussaatillutik eqqumiitsuliortunik apereqqaartariaqartussaatitaasanngitsut, Billedkunstnernes Forbundip aamma Københavnimi ilisimatusarfiup eqqumiitsulianik kulturimillu ilisimatusarnermik immikkoortuani lektorip Malene Vest Hansenip aamma oqaatigaat.

Nunatsinnili eqqumiitsuliorup silarsuaa nunarsuup sinnerani eqqumiitsuliornerup silarsuaanit allaaneroqisoq, Nivi Christensen oqarpoq.

- Nunatsinni eqqumiitsuliortut katersugaasiviillu malunnartumik attaveqatigiilluarneroqaat, maanimi saqqummersitsiveqarnanilu katersugaasiviit qassikattaannaagamik. Nunatsinni eqqumiitsuliornermik suliaqartuusugut amerlanngilagut, taamaammat ataqatigiittaqaagut, taanna oqarpoq.

Taamaannera, Ivaaq Kriegelip aamma arajutsisimanngilaa. Eqqumiitsuliortummi Katuap kulturiliffiuneranut tunngaviulluinnartuummata Katuap atorfissaqartippai. Taamaammat eqqumiitsuliortunik saqqummersitsinissanut tusarnaartitsinissanullu nalilersueqateqartarnissartik piffissami kingullermi ukkatarilluinnaritsik, taanna oqarpoq.

- Taakkuugamimmi Katuamut immersuisut. Taamaammat Katuap eqqumiitsuliortullu suleqatigiinnerat attaveqatigiinnikkut, isumaqatigiinnikkut taamatut ingerlannissaat pingaarluinnarpoq.

Aamma atuaruk

Iranip præsidentia nunanullu allanut tunngasunut ministeri qulimiguulik nakkarmat ajunaartut

Pineqaatissinneqarsimasunik inissiisarfimmi ineqatigiisitsisarneq utaqqisukillisitsisoq

Ritzau

Slovakiami præsidenti inuunerminik navianartoriorunnaarpoq