Politiit ullormut nalunaarutaat: Kufferti aningaasarpassuarnik imaqartoq mittarfimmi nassaarineqartoq

Politiit marlunngornermi immikkut ittumik ulapipput.

Nuummi mittarfimmi akitsuuserisut kuffertimik aningaasarpassuarnik imaqartumik nassaarnerminnik nalunaaruteqarnerannik ulloq aallartippoq.

- Aningaasarpassuarnik imaqartoq paasivarput. Pinerlunnikkut aningaasarsianik malunnarunnaarsaasoqarneranik suliamik aallartitsisoqarpoq, Kalaallit Nunaanni Politiini sillimasut pisortaat, Aputsiaq Hansen oqarpoq.

Suliamut atatillugu tigusarinnittoqarlunilu unnerluutiginnittoqarpoq, politiilli aningaasat qanoq amerlatiginersut paasissutissiissutigisinnaanngilaat.

Facebookikkut peqquserluttuliorneq

Tamatuma saniatigut inuit marluk facebookikkut peqquserluttuliorfigineqarput. Aappaa kavaajamik tigunngisaannakkaminik pisisimavoq, aappaalu mattammik 6 kiilumik pisisimavoq, kingornalu tunisisumit Facebookikkut attaveqarfigineqarsinnaajunnaarsinneqarsimalluni.

- Innuttaasut facebook aqqutigalugu pisigaangamik mianersorluartarnissaannik kaammattuuteqarfigerusuppagut, Aputsiaq Hansen oqarpoq:

- Tuniniaasup tutsuiginassusia mianersuunneqartassaaq, pisinissaminut tunngatillugu apeqquteqarnerusassapput, facebookikkullu atuisuuffik peqquserluttuliornerorpasinnginnersoq misissorneqassaaq.

Sillimasut pisortaata Nuummi Akikimit Araba Kaffinik 14-inik tillittoqarnera aamma oqaatigaa.

- Inuit kaffinik inoqatinut attaveqaatitigut allatigulluunniit pasinartumik tuniniaasoqartoq takussagunikku tamanna uagutsinnut ilisimatitsissutigisinnaavaat.

ATV-mik tillinneq

Politiit Sisimiuni ATV-mik tillittoqarnera pillugu nalunaaqutaq 10:56 nalunaarfigineqarput. Illoqarfimmi ATV-nik tillittoqarneranik unnuaq aamma nalunaarutiginnittoqarpoq.

- ATV-t marluk pineqarunarput. Politiit suliamut atatillugu pasineqartumik tigusarinnipput, Aputsiaq Hansen oqarpoq.

Aammattaaq Nuummi nakuusertoqarnerinik marlunnik angerlarsimaffinnilu meerartaqartuni eqqissisimanngitsoqarneranik suliarpaaloqarluni.