Kommunip Nuummi angerlarsimaffeqanngitsut majuartarfeqarfinniittut qisuariarfigigai

Nuummi angerlarsimaffeqanngitsut inissiaqarfiit majuartarfeqarfiit ilaanni sinnguttartut KNR-imit sapaatip akunnerata siuliani oqaluttuaraarput.

Qapiarfiusami Blok 17-imi ima ingasatsigivoq allaat inissiaqarfimmi najugaqartut arlallit angerlarsimaffeqanngitsunik majuartarfeqarfinniittartunik naapitsigaangamik toqqissisimaneq ajorlutik.

Majuartarfeqarfiit quiffigalugit, pujortarfigalugit, anarfigalugit imerfigalugillu atortaraat, KNR-imit apersorneqartunit oqaatigineqarpoq.

Tamannalu iliuuseqarfigineqanngilaq, aamma naak ineqartut oqartussanut assigiinngitsunut soorlu Kommuneqarfik Sermersuumut, naalakkersuisunut aamma partiinut tamanut, inissiaatileqatigiiffimmut, ineqarneq pillugu maalaarnissamut ataatsimiititaliassamut politiinullu ajornartorsiutaasumut aaqqiissuteqaqqusillutik saaffiginnittaraluartut.

Kommuneqarfik Sermersuumi isumaginninnermut ataatsimiititaliap siulittaasua, Justus Hansen angerlarsimaffeqanngitsut illoqarfimmi majuartarfeqarfinniittartut ajornartorsiutaanerat pillugu kiisami akissuteqarpoq.

Inissaaleqineq angerlarsimaffeqanngitsunullu unnuisarfimmeeqqusaannginneq

Taassuma inissaqaratik Nuummut nuuttartorpassuit pingaarnertut ajornartorsiutaanerarpaa, taamaammat taakku inissiaqarfinni isaariaanni parnaarsinnaanngitsuni unnuisalertarput.

Tamannalu naak illoqarfiit pingaarnersaanni angerlarsimaffeqanngitsunut marlunnik unnuisarfeqaraluartoq pisarpoq.

Justus Hansenip angerlarsimaffeqanngitsut ilaat nipiliornerit allanillu ingerlatsisunit akuerineqarsinnaanngitsumik iliuuseqarsimasut angerlarsimaffeqanngitsunut unnuisarfinnut iseqqusaajunnaarsimasartut oqaatigaa.

Tamatuma peqatigisaanik Nuummi inissaaleqisoqareernera pissutsinut pitsaanerulersitsinngitsoq, siulittaasup oqaatigaa.

- Taamaammat illoqarfiit pingaarnersaannut nussortut ajornartorsiutaasorujussuupput, Justus Hansen oqarpoq, kommunalbestyrelsillu pissutsit 'eqqummaariffiginiarneqartut' erseqqissaatigalugu.

Oqartussat allat suleqatigineqassasut

Nuummi angerlarsimaffeqanngitsut qanoq amerlatiginersut oqaatigiuminaatsoq, Kommuneqarfik Sermersuup paasissutissiissutigaa.

Angerlarsimaffeqanngitsulli qaammatip siuliani nalunaarsorneqartut 448-upput.

Illoqarfiit pingaarnersaanni angerlarsimaffeqanngitsunut unnuisarfiit marluk 73-inut inissaqartitsipput, taakkulu 94-init januaarimi atorneqarput.

Blok 17-imut tunngatillugu – taanna inissiaatileqatigiiffiup INI A/S-ip aqutaraa, taannalu naalakkersuisunit pineqartoq, Justus Hansenip oqaatigaa, Kommuneqarfik Sermersuup oqartussat allat suleqatigalugit pissutsinut aaqqiissutissarsiornerarlugit.

- Naalakkersuisut peqatigalugit, siammasinnerusumik itisiliinerusumillu  suleqatigalugit tamakkua pinngitsoortinniarlugit suleqatigiissaagut, taanna oqarpoq.

Qapiarfiusaq Blok 17-imi majuartarfeqarfiit parnaartartunngortinneqarnissaat sulissutigineqartoq INI-p allakkatigut akissutigaa.

Ineqartulli soorlu Nukaaka Tobiassenip timimi eqqissisimanerulernissaanut iliuuseqartoqarnissaa suli utaqqigini KNR-imut siusinnerusukkut oqaatigaa, taassumami ineqarfimmi majuartarfiini inunnik nalasoqartoq angerlaraangami suli takusarpaa.