Kommune Qeqertalimmi borgmesteri: Meeqqat sipaarniarfigineqanngillat
Kommune Qeqertalimmi Attumi meeqqerivik Alliami meeqqat sipaarniarfigineqarlutik qulip qeqqanut pingasullu qeqqanut nerisaat peerneqartut, kommunalbestyrelsimut ilaasortap, Aqqa Samuelsenip (S) tusagassiuutinut nalunaaruteqarluni allappoq.
Attumilu meeqqerivimmiittuutillip, Johanne Inûsutup, meeqqerivimmut ataatsimiigiaqqusaanermini meeqqat nerisaat peerneqassasut ilisimatinneqarlutik, KNR-imut oqaluttuarpoq.
Meeqqalli meeqqerivimmiittut sipaarniarfigineqanngitsut, Kommune Qeqertalimmi, borgmesterip naqqiutigaa. Kommune Qeqertallip facebookikkut qupperneranut nalunaaruteqarluni ilaatigut ima allappoq:
- Sakkortuumik naqqiutigerusuppara meeqqerivinnut sipaarniartoqanngimmat, tamannalu politikkikkut aamma kommunimi ingerlatsinikkut anguniarneqanngimmat.
Taassuma kommunip sipaartariaqarnera nassuerutigaa. Kisianni meeqqat sipaarniarfigineqassanngitsut kommunalbestyrelsimi isumaqatigiissutaasoq erseqqissaatigaa:
- Erseqqissaatigissavara kommunalbestyrelsi septembarip 11-anni 2025-mi ataatsimiinnermini aaliangernikuummat ukiup sinnera aningaasanik atuinaveersaassasoq. Tamannali meeqqanut, utoqqarnut innarluutilinnut inulerinikkut inatsisitigut pisussaaffeqarfiusuni atuutsinneqassanngitsoq aaliangerneqarpoq, Simigaq Heilmann allappoq.
Kommune Qeqertaliup pisortaa, Kangaatsiami sullissivimmii pisortaq, Kangaatsiami meeqqerivimmi pisortaq kiisalu Attumi meeqqerivimmi pisortaq, borgmesterip pingasunngornermi ataatsimeeqatigalugit, nalunaarummini allappoq.
- Taakkua uppernarsarpaat angajoqqaanik ataatsimiisitsinermi nerisaqarnikkut aaqqissuusseqqinnertik oqaluuserisimagaat, oqaluuserinninnerli kommunitta sipaarniarneranik tunngaveqanngitsoq.
- Illuanilli neriffissani nerisassat amerlineqartut, meeqqat timiminnik atuilluartarmata nererusunnertik malillugu nerisarnissaat pingaartillugu.
Meeqqap meeqqanukaannerani nerilluarsimanersoq nerilluarsimannginnersorluunniit sulisunut oqaatigissallugu pingaaruteqartoq, ilanngullugu taassuma inassutigaa, imalu naggasiilluni:
- Angajoqqaat ernumasut oqarfigerusuppakka meeqqat suli toqqissisimallutik meeqqerivimmiissinnaammata. Meeqqat pillugit angajoqqaat pisortallu suleqatigiilluarnissarput pisariaqarpoq, tassungalu ataatsimoornissarput kissaatigaara.
