Kalaallit Nunaata Radioa (KNR) ilisimatitsivoq tusagassiortut nutserisullu nutaarsiassalerinermik suliaqartut arlallit sisamanngornermi 27. februaari sulinerminnik unitsitsisimasut.

KNR-ip aammalu sulisut pineqartut kattuffiisa Dansk Journalistforbundip aamma Atorfillit Kattuffiata suliumajunnaarneq isumaqatigiissutinik unioqqutitsinertut nalilerpaat, eqqissisimaqatigiittussaatitaanermik unioqqutitsimmat taamaattumillu inatsisinik unioqqutitsilluni.

Sulisut pineqartut kissaatigaat immikkoortortaqarfimmi sulinertik taama ilungersunartigimmat 11. marsi Inatsisartunut qinersereernerup tungaanut radiuaviisit tamarmik unitsikkallarneqartariaqartut.

Piumasaqaat taamaattoq KNR-imi qullersat soorunami akuerisinnaanngilaat, radiuaviisi tassaammat inuiaqatigiit kalaallit nutaarsiassanik pilersorneqarnerannut aalajangiisuulluinnartumik inissisimasoq. Radiuaviisi KNR-ip innuttaasunik kiffartuussisussaatitaanerani qitiulluinnartuuvoq, piffissamilu matumani qineqqusaarfiusumi pingaaruteqarluinnartuulluni. Qineqqusaartoqarnerani innuttaasut oqartussaaqataanerannut demokratiimut pingaaruteqarluinnarpoq, tassuunakkummi nutaarsiassat paasissutissallu tatiginartut inuiaqatigiinnut siammarneqartarmata.

KNR-ip qullersaasa aaqqiissutissat arlariit sulisut pineqartunut sulinerminni artukkigaanerannik oqiliallatsitsisinnaasut aallartittareeraluarpaat, aammalu pineqartunik oqaloqateqarnerit ingerlatereerlugit. Nutaarsiassaqartitsivimmi sulisut inunnik tallimanik KNR-imi immikkoortortani allaneersunit ilaneqareerput, aammalu radiuaviisip danskisuup ilanngarneqarluniluunniit matuneqarallarnissaanut periarfissaq ammatinneqaraluarluni. Sulisulli pineqartut suliumajunnaarnissamik isummernerannik allanngortitsinissamut tamakku iluaqutaasimanngillat.

Sulisut pineqartut kingullertut piumasaqaatigaat nutaarsiassaqartitsivimmi ingerlatsinermut akulerunnissartik. Sunniuteqarfigiumasivaat suliat sorliit, qaqugu qanorlu ingerlanneqartassanersut. Taamaaliortoqarniarnera sulisitsisup aqutsisussaatitaaneranut akulerunniarnertut paasineqarsinnaavoq. Isumaqatigiissutit unioqqutillugit suliumajunnaarnikkut suliffeqarfiullu aqutsisussaatitaaneranut akulerunniarnikkut suliffinni maleruagassani toqqammaviulluinnartut suusupagineqarput.

Erseqqissarneqassaaq nutaarsiassaqartitsivimmi atorfeqavissut kisimik pineqarmata. Akunnermusiaqarlutik sulisut suliffimmilu misiliisut uani peqataanngillat.

KNR-ip qullersai ilungersorput aaqqiissutissanik ujaasillutik, taamaaliornikkullu isiginnaartartunut, tusarnaartartunut atuisunullu kingunerisassai annikinnerpaamiitinniarlugit, aammalu nalinginnaasumik ingerlatsineq uterfigeqqikkumallugu. Inuiaqatigiinnut akisussaaffeqarnerput pimoorupparput, ilungersussaagullu inuiaqatigiit kalaallit nutaarsiassaqartitsinermik pisarialimmik pilersorumallugit.

KNR-imi qullersat sinnerlugit

Bjørk Lange Olsen

Pisortaagallartoq