KNI-mi kannguttaatsuliorneq: Pisortaasimasup eqqartuunneqarnissaa ullumi aallarnerneqassasoq
KNI-p pisortarisimasaanik, Peter Grønvold Samuelsenimik eqqartuussinissaq oqallisaangaatsiartoq marlunngornermi ullaakkut qulingiluanut aallarnerneqassaaq.
Taanna arnanut katillugit tallimanut KNI-mi atorfeqarneranni kannguttaatsuliorsimasutut pasineqarpoq.
Unnerluussisussaatitaasup qaammatini pingasuni pineqaatissinneqarsimasunut inissiisarfimmiitsitsisoqarnissaa piumasaraat, Peter Grønvold Samuelsenili pinngitsuunerarluni pinngitsuutinneqarniarpoq.
Eqqartuussivimmi suliaq ullumi marlunni – tassa ullumi aqagulu pingasunngornermi eqqartuussissutigineqassaaq.
Unnerluussissut KNR-ip takunnissinnaaffigisaa naapertorlugu kannguttaatsuliornerit nassuiaatigineqartut KNI-p allaffiani aamma suliffimmut atatillugu angalanerni 2016-ip 2021-llu akornanni pisimapput.
KNI (Kalaallit Niuerfiat)
KNI namminersorlutik oqartussat ingerlatseqatigiiffiutigaa, tassannga nioqqutissanik, ikummatissanillu pilersuisoqartarpoq.
Ingerlatseqatigiiffik sisamanik ingerlatsiveqarpoq, tassa Polaroil, Pilersuisoq, KNI Engros piginneqatigiiffillu allamit aqunneqartoq Neqi A/S.
KNI-p qullersaqarfia Sisimiuniippoq.
Kissaatiginngisamik kuninneqarneq atoqatigiinnermillu apersorneqarneq
Arnat tallimat atorfeqarnermi nalaani pisortaanerusimasumit kissaatiginngisaminnik attuuaneqartarsimallutik oqaatigaat.
Matumani pukusukkut, tuillut, siffiakkut, qitikkut, unikkut nulukkullu attorneqarnerit ilaatigut pineqarput.
Arnat arlallit eqitsillutillu uluakkut imaluunniit pukusukkut kunitsittarsimallutik kiisalu iviangequtimi ujatsiutitaatitaat tigusarai oqaatigaat.
Arnap ataatsip iviangini pisortaasimasup assaminik attorniassagamigit, tunuminut periarluni assani uniata nalaasigoortissimagai nassuiaatigaa.
Pisumi allami arnaq tigoriarlugu atoqatigiinnermi ”trillebør”-ertuusaarneq oqaatigisimavaa.
AAMMA ATUARUK KNI-mi sulisuusimasoq: Tununninngaanniit ivianngikkut attuuavaanga
Arnat arlallit Peter Grønvold Samuelsen atoqatigiittarnerminnut tunngasumik apersuisarsimanerarpaat.
Arnat ilaata ”qanorli siniffimmut qilersorlutit” aamma ” ilaani naalanngituulaartarama” pisortaasimasup oqaatigisimagai oqaatigaa.
KNI A/S-imi kanngunartuliat
- KNI-p aningaasaqarneranut atatillugu kukkunerit qoqassiiniarnerillu, siorna novembarimi nalunnginnittut tusagasiuutinut oqaluttuarnerisa kingorna saqqummeralerput.
- Qaammatini arlalinni misissuisoqareersorlu, aningaasaqarnikkut qoqassiiniartoqarsimasoq siulersuisut nassuerutigaat. Manna tikillugu akileraannginnermi tamanna ingerlatsivimmut 112 miliuuni koruuninik akeqarsimavoq 12,5 miliuuni koruuninillu amigartoortitsilluni.
- Pisimasulli suli akisunaarutaasinnaanersut ingerlatsivimmi pisortat suli ilisimanngilaat.
- Uppernarsaatinik salloqittaasiorsimasutut pinerlunniarsimasutullu inuk ataaseq politiinut unnerluutigineqarpoq, taannali kinaanersoq aningaasallu qassit pineqarnersut, KNI-mit oqaatigineqarumanngillat.
- Tamatuma saniatigut kinguaassiuutitigut kanngutsaatsuliorsimasutut unnerluussaalluni pisortaq Peter Grønvold Samuelsen soraarsitaavoq. Taanna tassunga atatillugu politiinut unnerluunneqarpoq.
- Unnerluussinerit saqqummertalermata pisortaasimasoq Peter Grønvold Samuelsen soraarsinneqarpoq. Taassumunnga paarlattaavoq Jeppe Jensen. Tamatuma saniatigut sulisunik sullissivimmi pisortaasimasoq siulersuisunullu siulittaasuusimasoq Lars Borris Pedersen tunuarpoq, taannalu Svend Hardenberg-ip paarlappaa.
Atorfimminit soraartoq
KNI-mi pisortaasimasoq kannguttaatsuliorsimasutut politiinut unnerluutigineqartoq 2021-mi marsimi saqqummiunneqarpoq.
Taanna tassunga atatillugu oqarpoq:
- Ajuusaarlungalu utoqqatserpunga kimulluunniit killissaanik qaangiillunga innimiilliorfiginnissimassaguma pissusilersornikkut oqaatigisimasakkulluunniit.
Peter Grønvold Samuelsen tamanna sioqqutitsiarlugu atorfimminit soraarpoq.
Taassuma soraarneranut suna pissutaanersoq piffissami tassani saqqummiunneqanngilaq.
Peter Grønvold Samuelsenili suliffeqarfiup iluani innimiilliortoqartarneranik misissuisoqarnerata kingunerisaanik soraaqquneqaqqaariarluni KNI-mit soraarsinneqarsimasoq KNI-p siulersuisuisa nutaat oktobarimi paasissutissiissutigaat.
Peter Grønvold Samuelsen KNI-mi ukiuni arfineq-marlunni pisortaaneruvoq.
Taanna siorna decembarip ulluisa aallaqqaataani aappaanilu eqqartuussaasussaagaluarpoq, tamannali illersuisup unnerluussisussaatitaasullu Nuummi mittarfiup quasarnera pissutigalugu aallarsinnaannginnerat pissutigalugu kinguartinneqarpoq.
Tamatuma saniatigut illoqarfiit pingaarnersaanni qamittooqqangaatsiartoqarpoq, tamannalu pissutigalugu eqqartuussineq videokkut ingerlanneqarsinnaanani.
