KNAPK nutaamik siulittaasoqalersoq
Pele Blytmann KNAPK-mi aallartitanit taaguunneqarluarluni siulittaasunngorpoq. Maannamut siulittaasoq, qinigassanngorteqqikkaluartoq Nikkulaat Jeremiassen, taamaalilluni siulittaasutut ingerlaqqinngilaq.
Allattoq Jens Thorin
oktobarip 02-at 2025 18:03
Pele Blytmann KNAPK-mut aallartitanit 17-init taaguunneqarluni siulittaasunngorpoq.
Tamanna KNAPK-mut aallartitat Ilulissani ippassaq sisamanngornermi naammassisumik ataatsimeersuarnerani pivoq.
Pele Blytmann maanna ataatsimeersuarnissap tungaamut siulersuisuusuni ilaasortaanngilaq. Taanna Ilulissani aalisartuuvoq, KNAPK-llu immikkortortaqarfiani maannamut siulittaasuulluni.
Nikkulaat Jeremiassen , arfineq marlunnit taaguunneqarpoq, taakkuali siulittaasutut ingerlaqqinnissaanut naammanngillat.
KNAPK-p siulittaasuanut tullersortitut Qaqortumi immikkortortaqarfiup siulittaasua Jens Peter Kielsen inissippoq.
