Kitaani nunap ilaa 2027-mi allanngutsaaliugassanngortinneqassasoq
Qeqertarsuup Kangerlussuullu akornanni nuna 15.000 kilometerit missaattut annertutigisoq.
Tassa nunatta ilaa allanngutsaaliugassanngortitassaq taama annertutigaaq.
Qeqqata Kommunianimi aamma Kommune Qeqertalimmi politikerit Kitaani nunap ilaa allanngutsaaliugassanngortinneqassoq siunnersuutigaat.
Kitaani nunap ilaanik allanngutsaaliugassanngortitsiniarneq EU-p mingutsitsinnginneruleriartornissamut aningaasaliissutaanit 2027-ip tungaanut aningaasalersorneqassasoq, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik tusagassiorfinnut nalunaarpoq.
- Nuna allanngutsaaliugaq aamma kinguaariinni tulliuttut pinngortitamik kingornussaminnik asseqanngitsumik inuussuteqarsinnaanerannik iluaquteqarsinnaanerannillu qulakkeerinissamut tullertut alloriarnerussaaq, Kommune Qeqertaliup borgmesteria Ane Hansen, Qeqqata Kommuniata borgmesteria Malik Berthelsen aamma Nunalerinermut, Imminut Pilersornermut, Nukissiutinut Avatangiisinullu naalakkersuisoq Kalistat Lund tusagassiorfinnut nalunaarummi allapput.
Piniarneq uumasullu illersorneqassasut
Nunarsuarmi nunani allanngutsaaliugassanngortitani annertunerpaaq nunatta avannarpasissuata kangisissuaniittuusoq 972.000 kilometeritut annertussuseqarpoq.
Piniartut aalisartullu piniarsinnaanissaat tamaanilu tamatumalu imartaani uumasut naasullu illersornissaat, Kitaani nunap ilaa allanngutsaaliugassanngortinniarneqarpoq.
Tamaani atajuartussamik takornariaqarnerup ineriartortissinnaanissaa aamma neriuutaavoq.
Nunatta kitaani nuna allanngutsaaliugassatut pilersaarutigineqartoq avannaanit Naternamit Qasiannguit kujataaniittumit kujammut Eqalummiut Nunaannut Kangerlussuup kujataaniittumut isortussusseqassaaq.
Sulili aalajangiisoqavinngilaq, Naalakkersuisut kommunit suleqatigalugit sumiiffimmi soqutiginartut assigiinngitsut aallaqqaammut nalunaarsussavaat.
- Naalakkersuisuni najukkani innuttaasunut, najukkani inuussutissarsiortunut, illoqarfinnut nunaqarfinnullu sumiiffiup iluaqutaanissaata qulakkeerneqarnissaa pissusissamisuuginnartutut kissaatigaarput, naalakkersuisoq, Kalistat Lund (IA) oqarpoq.
- Taamaattumik Kalaallit Nunaata kitaani nunap allanngutsaaliukkap siulliup pilersitsiniarluta sulinitsinni amerlasuut, aammalu soqutigisaqartut qanillugit akuutinneqarnissaat pingaaruteqarluinnarpoq, taanna tusagassiuutinut nalunaarummi naggasiivoq.